Իրաքի խորհրդարանը քայլեր է ձեռնարկում թուրքական զորքերին երկրի հյուսիսից արտաքսելու համար, գրում է Mehr-ը։
Իրաքի խորհրդարանի անդամներից մեկը հայտնել է, որ տարբեր քաղաքական խմբերի ներկայացուցիչներ քայլեր են ձեռնարկում թուրքական ուժերին Իրաքի հյուսիսային տարածքից դուրս մղելու համար։
«Կանցկացվեն կառավարության եւ խորհրդարանի նիստեր՝ այդ ուժերին արտաքսելու միջոցները քննարկելու համար, դրանք ներկայումս օկուպացիոն ուժեր են համարվում։
Նշելով, որ իրաքյան տարածքում Թուրքիայի ներկայության մասին լռությունը հանգեցնում է այդ թուրքական ուժերի ներթափանցման մեծացմանն ու ընդլայնմանը դեպի իրաքյան տարածքի խորք, նա Թուրքիայի գործողություններն անվանել է Իրաքի ինքնիշխանության խախտում, որը սպառնում է երկրի ազգային անվտանգությանը։
«Հանձնաժողովը հրատապ խնդրանքով դիմել է զինված ուժերի գերագույն գլխավոր հրամանատարին՝ անվտանգության հարցերով խորհրդակցություն անցկացնելու համար, որպեսզի քննարկեն թուրքական ագրեսիայի հարցը։ Որովհետեւ թուրքական բանակն անարգել մտել է իրաքյան հողի խորքերը»,- ասվում է Իրաքի խորհրդարանի անվտանգության եւ պաշտպանության հանձնաժողովի անդամի հայտարարության մեջ:
Հյուսիսային Իրաքում գտնվող թուրքական զորքերը երկար ժամանակ խախտում են երկրի օդային տարածքն ու ցամաքային տարածքը՝ PKK-ի դեմ պայքարի պատրվակով։ Ինքնիշխանության այս խախտումները շարունակվում են Իրաքի կենտրոնական կառավարության եւ պաշտոնյաների մշտական դատապարտման եւ բողոքի ֆոնին: