Մոսկվան չի հավատում Ուկրաինայի նախագահ Վլադիմիր Զելենսկուն ով հայտարարել է, որ Կիեւը չի պատրաստվում հարձակվել Ռուսաստանի Դաշնության տարածքի վրա, եթե ամերիկյան համազարկային կրակի ռեակտիվ համակարգեր (ՀԿՌՀ) ստանա: Այս մասին չորեքշաբթի, պատասխանելով ՏԱՍՍ-ի հարցին, ասել է ՌԴ նախագահի մամուլի քարտուղար Դմիտրի Պեսկովը:
«Ոչ», - պատասխանել է Կրեմլի ներկայացուցիչը հարցին` արդյո՞ք Կրեմլը վստահում է Զելենսկու խոսքերին: «Վստահելու համար պետք է դեպքերի փորձ ունենալ, երբ խոստումները կատարվել են։ Ցավոք, այդպիսի փորձ ընդհանրապես չկա»,- պարզաբանել է Պեսկովը։
Նշենք, որ Զելենսկին վստահեցրել է, որ ուկրաինացի զինվորականները մտադիր չեն հարձակվել Ռուսաստանի տարածքի վրա ՀԿՌՀ-ներով, որոնք նրանք կստանան ԱՄՆ-ից։ Ուկրաինան այդ զենքը կօգտագործի «բացառապես պաշտպանության համար»։
ԱՄՆ նախագահ Ջո Բայդենը հայտարարել էր, որ ԱՄՆ-ն համազարկային կրակի ռեակտիվ համակարգեր կուղարկի Ուկրաինա 700 միլիոն դոլարի սպառազինության փաթեթի շրջանակներում։ Այս լուրը հայտնվել էր Սպիտակ տան հակասական հաղորդումներից հետո, երբ մի քանի լրատվամիջոց հայտնեց, որ վարչակազմը պատրաստվում է ամերիկյան ՀԿՌՀՈւ-ներ տրամադրել, որոնք կարող են հրթիռներ արձակել մինչեւ 300 կիլոմետր հեռավորության վրա:
Բայդենը երկուշաբթի լրագրողներին ասել էր, որ ԱՄՆ-ն «չի պատրաստվում հրթիռային համակարգեր ուղարկել Ուկրաինա, որոնք կարող են հարվածներ հասցնել Ռուսաստանին», քանի որ մտավախություն կա, որ պատերազմն ավելի խոշոր հակամարտության կվերաճի: