Լիտվան Bayraktar TB2-ի գնման պայմանագիր է ստորագրել Թուրքիայի հետ, դրանք կմատակարարվեն ուկրաինական բանակին։ Լիտվայի ազգային պաշտպանության նախարար Արվիդաս Անուսաուսկասը Twitter-ի իր պաշտոնական էջում հայտնել է. «Այսօր Թուրքիայում Լիտվայի ազգային պաշտպանության նախարարն ու Թուրքիայի պաշտպանական արդյունաբերության դեպարտամենտի նախագահ Իսմայիլ Դեմիրը Bayraktar-ի ձեռքբերման պայմանագիր կնքեցին»:
«Անհավատալի է, որ Թուրքիան հենց նոր համաձայնեց Bayraktar տրամադրել, որի համար Լիտվան գումար էր հավաքել: ԱՆՎՃԱ՛Ր: Դա հիանալի է։ Հավաքած գումարով Bayraktar-ի համար անհրաժեշտ զինամթերք կգնենք, իսկ մնացած գումարը նույնպես կուղղվի Ուկրաինայի աջակցությանը։ Շնորհակալություն, Թուրքիա»,- գրել է նա։
Անցյալ շաբաթ լիտվական Laisves TV հեռուստաընկերությունը, որը հիմնադրել է լրագրող եւ ակտիվիստ Անդրիուս Տապինասը, արշավ էր սկսել, որը մոտ 5 միլիոն եվրո է հավաքել՝ ուկրաինական բանակի համար թուրքական անօդաչու սարքեր գնելու նպատակով։
Թուրքական զենքի ձեռքբերման գործարքը ստորագրել են Լիտվայի պաշտպանության փոխնախարար Վիլիուս Սեմեսկան եւ Թուրքիայի պաշտպանական արդյունաբերության տնօրինության ղեկավարը։
«Մենք պայմանագիր ստորագրեցինք։ Սա նշանակում է կանաչ լույս քաղաքական մակարդակով հետագա ձեռքբերումների համար»,- Վիլնյուսում լրագրողներին ասել է Լիտվայի պաշտպանության փոխնախարար Վիլիուս Սեմեսկան։ Նա նաեւ հավելել է, որ Դեմիրի հետ բանակցել է ոչ միայն հավաքված գումարով Bayraktar ձեռք բերելու, այլեւ Լիտվայի զինված ուժերի համար առնվազն մեկ անօդաչու թռչող համակարգ գնելու համար։
Պայմանագրի համաձայն՝ կմատակարարվի առնվազն վեց անօդաչու թռչող սարք, ներառյալ՝ դրանց շահագործման համար անհրաժեշտ սարքավորումները։
