Շվեդիան Ուկրաինային լրացուցիչ տնտեսական օգնություն եւ ռազմական տեխնիկա կտրամադրի, այդ թվում՝ հականավային հրթիռներ, հրացաններ եւ հակատանկային զենքեր, հայտարարել են ֆինանսների նախարար Միքայել Դամբերգը եւ պաշտպանության նախարար Պիտեր Հուլտկվիստը, փոխանցում է Reuters-ը։
«Առաջարկները, որոնք ներկայացվել են (խորհրդարան), նշանակում են, որ 2022 թ. կենտրոնական կառավարության բյուջեին հատկացվող միջոցները կավելանան 1.0 մլրդ կրոնով (102 մլն դոլար)»,- ասվում է ֆինանսների նախարարության հայտարարության մեջ։
«Որպես Ուկրաինայի հետ սոլիդարության նշան եւ Ռուսաստանի գործողություններին միջազգային պատասխանի շրջանակներում՝ կառավարությունն Ուկրաինային աջակցելու մշտական անհրաժեշտություն է տեսնում»,- ասվում է հայտարարության մեջ։
Շվեդիան փետրվարին հայտարարել էր, որ ռազմական տեխնիկա կուղարկի Ուկրաինա, այդ թվում՝ 5000 հակատանկային զենք, սաղավարտ եւ զրահաբաճկոն, իսկ մարտին հայտարարել էր, որ եւս 5000 հակատանկային միջոց կուղարկի:
