Սաուդյան Արաբիան փորձում է այս տարի եռակի ավելացնել օտարերկրյա զբոսաշրջիկների հոսքը, քանի որ համավարակի հետ կապված սահմանափակումները թուլանում են, ուխտագնացները վերադառնում են եւ բացվում են թագաժառանգ արքայազնի առաջին ֆիրմային նախագծերը, AFP-ին տեղեկացրել է երկրի տուրիզմի նախարար Ահմեդ Ալ Խաթիբը։

Թագավորությունը 2019թ. սեպտեմբերին, համավարակից մեկ ամիս առաջ, սկսել էր զբոսաշրջային վիզաներ բացել, բայց կորոնավիրուսը կաթվածահար արեց ճյուղն ամբողջ աշխարհում։

Անցած տարի երկրի իշխանությունները գրանցել են ռեկորդային՝ 64 միլիոն «ներքին այցելություններ». դա օգնեց փրկել սաղմնավորվող սաուդյան տուրիզմը կործանումից, եւ այժմ իշխանությունները ցանկանում են ավելի մեծ թվով շուկաներ զբաղեցնել, ասել է նա հարցազրույցում։

«Այժմ մենք փորձում ենք հասնել այն բանին, որպեսզի ավելի մեծ թվով միջազգային այցելուների հրապուրենք»,- ասել է նա՝ հավաստիացնելով, որ նպատակն այս տարի 12 միլիոնն է՝ 2021-ի 4 միլիոնի համեմատ։

Սաուդյան Արաբիան զարմանք է առաջացրել մինչեւ 2030թ. 100 միլիոն զոբսաշրջիկ հրապուրելու իր նպատակով, ինչը թագաժառանգ Մուհամեդ իբն Սալմանի «Տեսլական 2030» բարեփոխումների ծրագրի մի մասն է։

Խաթիբը կիրակի նշել է, որ մինչեւ 2030թ. նպատակային 100 միլիոն այցելուներից 30 միլիոնը պետք է գա արտասահմանից, իսկ մյուսները կճամփորդեն Սաուդյան Արաբիայով։

Մոտ 30 միլիոն այցելություն լինելու է կրոնական (ինչպես երկրի բնակիչներ, այնպես էլ օտարերկրացիներ), հիմնականում Մեքքա եւ Մեդինա՝ իսլամի երկու սրբազան վայրեր։

Հաջորդ ամիս իշխանությունները նախատեսում են թույլ տալ հաջ կատարել մեկ միլիոն ուխտագնացների. երկու տարի կորոնավիրուսի համավարակը ստիպել էր խիստ սահմանափակել ամենամյա ուխտագնացության մասնակիցների թիվը։

Հետաքրքիր են նաեւ այսպես կոչված գիգանախագծերը, որոնք գլխավորում է թագաժառանգը, ներառյալ 500 միլիարդ դոլար արժողությամբ ֆուտուրիստական մեգապոլիսը, որը հայտնի է որպես NEOM, եւ Դիրիան՝ սաուդյան առաջին պետության նստավայրը, որը վերակառուցվում է որպես զվարճանքների կենտրոն։