Ամերիկյան IBM ընկերությունը, որը արտադրում է սարքավորումների եւ ծրագրերի ապահովում, հայտարարել է Ռուսաստանում բոլոր գործառույթները դադարեցնելու մասին, ասվում է ընկերության գլխավոր տնօրեն Արվինդ Կրիշնայի հայտարարության մեջ։
«Ես լսել եմ ձեզնից շատերից՝ ի պատասխան անցյալ շաբաթ Ուկրաինայում պատերազմի հայտարարման, եւ ես գնահատում եմ ձեր արձագանքները: Նախ, թույլ տվեք հստակեցնել՝ մենք դադարեցրել ենք բոլոր գործողությունները Ռուսաստանում»,- ասել է Կրիշնան ընկերության կայքում հրապարակված հաղորդագրության մեջ:
Նա նաեւ պատմել է ընկերության ուկրաինացի աշխատակիցներին աջակցելու միջոցառումների մասին, մասնավորապես՝ երկրից տարհանման հետ կապված օգնության հարցում։
«IBM-ի աշխատակիցներին ամբողջ աշխարհում խորհուրդ է տրվում շարունակել նվիրատվությունները Միջազգային Կարմիր Խաչին: Ուկրաինայում մենք մշտապես կապ ենք պահպանում մեր տեղական թիմերի հետ եւ շարունակում ենք օգնություն ցուցաբերել, ներառյալ տեղափոխումը եւ ֆինանսական աջակցությունը: Այս ճգնաժամից տուժած բոլոր ոլորտներում IBM-ի աշխատակիցների եւ նրանց ընտանիքների անվտանգությունն ու պաշտպանությունը մնում է մեր առաջնահերթությունը»,- հավելել է նա: