Եվրամիությունն աշխատում է Ռուսաստանին ամպային ծառայությունների մատուցման հնարավոր արգելքի վրա՝ նոր պատժամիջոցների շրջանակում, հայտնում է Reuters-ը՝ հղում անելով ԵՄ ներկայացուցչին։
Արգելքի ներդրման դեպքում պարզ չէ, թե դա ինչպես դա կանդրադառնա Ռուսաստանի վրա, քանի որ Եվրոպայում ամպային ծառայությունների առաջատար մատակարարները ամերիկյան ընկերություններն են, այդ թվում՝ Amazon-ը, Google-ը եւ Microsoft-ը:
Անցյալ շաբաթ Եվրամիությունը պատժամիջոցների նոր փաթեթ ընդունեց Ռուսաստանի եւ Բելառուսի դեմ, որը ներառում էր նավթի էմբարգո, սահմանափակող միջոցներ ռուսական բանկերի նկատմամբ եւ խորհրդատվական ծառայությունների արգելք։
ԵՄ Խորհրդի կողմից հունիսի 3-ին հրապարակված պատժամիջոցների փաթեթի վերաբերյալ նախնական մամուլի հաղորդագրությունում նաեւ հիշատակվում էր ամպային ծառայությունների տրամադրման արգելքի մասին, սակայն այդ հղումը հետագայում հեռացվել է։ Այս պատժամիջոցը չի հայտնվում ԵՄ պաշտոնական ամսագրում հրապարակված իրավաբանական տեքստերում։
Եվրոպական խորհրդի մամուլի քարտուղարն ասել է, որ ամպային ծառայությունների նկատմամբ պատժամիջոցների նախնական հիշատակումը «էական սխալ» է, եւ հրաժարվել է ասել, թե կարող է արդյոք դա պայմանավորված լինել ԵՄ երկրների միջեւ այդ հարցի շուրջ բանավեճերով:
Պատժամիջոցների մասին որոշումներին ծանոթ ԵՄ պաշտոնական ներկայացուցիչն ասել է, որ ամպային ծառայությունների վերաբերյալ միջոցառումը երբեք չի առաջարկվել Եվրահանձնաժողովի կողմից, բայց հավելել է, որ ԵՄ-ն աշխատում է պատժամիջոցների հետագա հնարավոր փուլերի արգելքի վրա՝ չնայած դա տեխնիկապես բարդ է: