ՄԱԿ-ի գլխավոր քարտուղար Անտոնիո Գուտերեշը հայտարարել է, որ Ուկրաինայում պատերազմի հետեւանքներն աշխարհի համար գնալով սրվում են, եւ արդյունքում, ամենայն հավանականությամբ, 1.6 միլիարդ մարդ կտուժի:
«Պատերազմի ազդեցությունը պարենային անվտանգության, էներգետիկայի եւ ֆինանսների վրա համակարգային, լուրջ եւ արագացող բնույթ ունի»,- ասել է գլխավոր քարտուղարը՝ ներկայացնելով ՄԱԿ-ի երկրորդ զեկույցը հակամարտության հետեւանքների վերաբերյալ։
Նա հավելել է, որ «ամբողջ աշխարհի մարդկանց համար պատերազմը սպառնում է սովի եւ աղքատության աննախադեպ ալիք սանձազերծել՝ սոցիալական եւ տնտեսական քաոս ստեղծելով». «Այդ սպասվող փոթորիկը կասեցնելու միայն մեկ ճանապարհ կա. ռուսական ներխուժումն Ուկրաինա պետք է դադարեցվի»:
Համաշխարհային կազմակերպության ղեկավարն ասել է, որ խնդրել է գործընկերներին օգնել «փաթեթային գործարք գտնել, որը ուկրաինական սննդամթերքի անվտանգ եւ հուսալի արտահանում Սեւ ծովով եւ անխոչընդոտ մուտք կապահովի դեպի համաշխարհային շուկաներ ռուսական պարենի եւ պարարտանյութերի համար»: «Այդ գործարքը կարեւոր է զարգացող երկրների հարյուր միլիոնավոր մարդկանց համար, այդ թվում՝ Աֆրիկայի՝ Սահարայից դեպի հարավ գտնվող երկրներում»,- ասել է Գուտերեշը:
Դիվանագետ Ռեբեկա Գրինսպենի ներկայացրած ՄԱԿ-ի զեկույցում ասվում է, որ մոտ 94 երկիր, որտեղ մոտ 1.6 միլիարդ մարդ է ապրում, «խիստ ենթարկվա են ճգնաժամի առնվազն մեկ չափման եւ ի վիճակի չեն հաղթահարել այն»:
«1.6 միլիարդ մարդկանցից 1.2 միլիարդը կամ երեք քառորդը ապրում են «կատարյալ փոթորկի» երկրներում եւ լրջորեն խոցելի են միաժամանակ բոլոր երեք՝ ֆինանսների, սննդի եւ էներգիայի ասպեկտների նկատմամբ»:
Զեկույցում ասվում է, որ պատերազմը կարող է 2022 թ. պարենային պակասից տուժող մարդկանց թիվն ավելացնել 47 միլիոնով՝ մինչեւ տարեվերջ հասցնելով 323 միլիոնի։
Ըստ գնահատականների՝ այս տարի մինչեւ 58 միլիոն աֆրիկացի կարող է աղքատության շեմից այն կողմ հայտնվել:
Զեկույցի համաձայն՝ ծայրահեղ աղքատությունը Մերձավոր Արեւելքում եւ Հյուսիսային Աֆրիկայում 2022 թ. կարող է ավելանալ 2.8 միլիոն մարդով, մինչդեռ Հարավային Ասիայում վտանգի տակ է 500 միլիոն մարդ: «Անհրաժեշտ է կոնկրետ ջանքեր գործադրել, որպեսզի սննդի եւ էներգիայի կենսական կարեւորության պաշարները հասնեն բնակչության առավել խոցելի շերտեին»,- ասվում է զեկույցում։