Հայաստանի իշխանությունները Հայաստանում ռուսական դպրոցի բացումը հնարավոր են համարում:
«Հայաստանում ռուսական դպրոցի բացումը կարող է քննարկվել, դա հնարավոր է, բայց այդպիսի որոշում դեռ չկա»,- ասաց ՀՀ կրթության, գիտության, մշակույթի եւ սպորտի նախարար Վահրամ Դումանյանը՝ կոչ անելով դավադրություններ չփնտրել այդ թեմայում։
NEWS.am-ի կողմից ավելի վաղ ներկայացված ՀՀ կրթության, գիտության, մշակույթի եւ սպորտի նախարարության տվյալների համաձայն՝ ռուսաց լեզուն ուսումնասիրվում է Հայաստանի բոլոր հանրակրթական հաստատություններում։ Ռուսերենով խորացված ուսուցում իրականացվում է 63 դպրոցներում, որից 33-ը Երեւանում, 30-ը՝ մարզերում։ 45 պետական հանրակրթական դպրոցներում գործում են ռուսերենի ուսուցման դասարաններ։ Հայաստանում ուսուցման լեզուն հայերենն է, ռուսերենը դասավանդվում է 2-րդ դասարանից, իսկ այլ օտար լեզուներ՝ 3-րդ դասարանից։
Նախարարը պարզաբանեց, որ տարբերություն կա ռուսական դպրոցի, որը գործում է ռուսական կրթական ծրագրով, եւ ներկայումս Հայաստանում գործող ռուսերենով, բայց՝ հայկական կրթական ծրագրով ուսուցմամբ դասարանների միջեւ:
«Որեւէ խնդիր չկա, անհրաժեշտության դեպքում վերջին իրադարձությունների ֆոնին մենք կարող ենք ավելացնել այդ դասարանների թիվը, մենք պատրաստ ենք նաեւ դիտարկել Ռուսաստանից ռուսաց լեզվի մասսայականացմանն աջակցելու հնարավորությունը»,- պարզաբանեց նա։
Ավելի վաղ ՌԴ ԱԳ նախարար Սերգեյ Լավրովը «հետաքրքրություն էր հայտնել, որպեսզի ռուսաց լեզուն մշտական աջակցություն ստանա բարեկամ կառավարության կողմից (ՀՀ)»։
Դումանյանը կոչ արեց ռուսերենը չհակադրել անգլերենին կամ հակառակը՝ օտար լեզուները հակադրել հայերենին: «Որքան շատ լեզու գիտենք, այնքան ավելի լավ»,- վստահություն հայտնեց նախարարը։
Նա հայտարարեց Վրաստանի սահմանամերձ դպրոցներում վրացերենի ուսուցում կազմակերպելու պլանների մասին՝ միեւնույն ժամանակ մատնանշելով ուսուցիչների պակասի խնդիրն ամբողջ Հայաստանում։