Իտալիայում եւ Ղազախստանում իտալական ընկերության հաքերային գործիքներ են օգտագործվել Apple Inc եւ Android սմարթֆոնները լրտեսելու համար, նշվել է Alphabet Inc Google ընկերության հաշվետվությունում, տեղեկացրել է Reuters-ը։
Միլանի RCS Lab ընկերությունը, որի կայքում որպես հաճախորդներ նշված են եվրոպական իրավապահ մարմինները, ստեղծվել է անձնական հաղորդագրությունների եւ շփումների լրտեսման գործիք, նշվել է հաշվետվությունում։
RCS Lab-ի մասին Google-ի եզրակացություններն ի հայտ են եկել այն պահին, երբ եվրոպական եւ ամերիկյան կարգավորողները քննարկում էին լրտեսական ծրագրերի վաճառքի եւ ներմուծման նոր կանոնները։
«Այդ մատակարարները նպաստում են վտանգավոր հաքերային գործիքների տարածմանը եւ զինում այն կառավարություններին, որոնք ի վիճակի չեն ստեղծել նման հնարավորություններ սեփական ուժերով»,- նշել են Google-ում։
Google ընկերությունը նշել է, որ Android օպերացիոն համակարգի օգտատերերի պաշտպանության միջոցներ է ձեռնարկել եւ նրանց զգուշացրել է լրտեսական ծրագրերի մասին։
RCS Lab-ը հայտարարել է, որ իր արտադրանքն ու ծառայությունները համապատասխանում են եվրոպական կանոններին եւ օգնում են իրավապահ մարմիններին հետաքննել հանցագործությունները։
Կառավարությունների համար լրտեսական ծրագրերի գլոբալ արտադրությունը մեծանում է, ավելի շատ ընկերություններ են ստեղծում լրտեսական ծրագրեր իրավապահ մարմինների համար։ Լրտեսության դեմ հանդես եկող ակտիվիստները նրանց մեղադրում են կառավարություններին օժանդակելու մեջ, որոնք որոշ դեպքերում օգտագործում են նման գործիքներ մարդու իրավունքների եւ քաղաքացիական իրավունքների ճնշման համար։
Երեւույթը հայտնվել է համաշխարհային հանրության ուշադրության կենտրոնում այն բանից հետո, երբ պարզվել է, որ իսրայելական NSO ընկերության Pegasus լրտեսական ծրագիրը շատ երկրների կառավարություններ օգտագործել են լրագրողներին, ակտիվիստներին եւ այլախոհներին լրտեսելու համար։