Ուրբաթ օրը ԵՄ առաջնորդները զգուշացրել են, որ «էժան էներգիա այլեւս չկա» եւ համաձայնել են ուժեղացնել ռուսական գազի մատակարարումների հետագա կրճատման նախապատրաստական աշխատանքները՝ Մոսկվային մեղադրելով էներգակիրների կրճատման համար, հաղորդում է Reuters լրատվական գործակալությունը:
«Գնաճը մեր բոլորի գլխավոր մտահոգությունն է: Ռուսաստանի ագրեսիվ պատերազմը բարձրացնում է պարենի, էներգիայի եւ ապրանքների գները», - երկօրյա գագաթաժողովի արդյունքների ամփոփմանը նվիրված մամլո ասուլիսի ընթացքում ասել է ԵԽ նախագահ Շառլ Միշելն ու հավելել, որ առաջնորդները համաձայնել են սերտորեն համակարգել իրենց տնտեսական քաղաքականության պատասխանները։
Եվրահանձնաժողովի ղեկավար Ուրսուլա ֆոն դեր Լեյենը, իր հերթին, ասել է, որ այլընտրանքային մատակարարումների որոնումներ են ընթանում եւ հավելել, որ Եվրահանձնաժողովը կպատրաստի առաջարկներ եւ տարբերակներ հոկտեմբերին կայանալիք ԵՄ հաջորդ գագաթաժողովում քննարկելու համար:
Վեճերից մեկն այն է, թե արդյոք կառավարությունները պետք է միջամտեն գների սահմանափակումների գործընթացին:
Այս ամիս Իսպանիան եւ Պորտուգալիան գազի գներ են սահմանել տեղական էլեկտրաէներգիայի շուկաներում, սակայն այլ պետություններ զգուշացնում են, որ գների սահմանափակումները կխաթարեն էներգետիկ շուկաները եւ, եթե կառավարությունները ստիպված լինեն վճարել գազի միջազգային շուկաներում սահմանված գնի եւ երկրի ներսում գործող գնի տարբերությունը, հետագայում կզրկվեն պետական գանձարաններից:
«Էժան էներգիա հասկացությունն անհետացել է, ռուսական էներգիա հասկացությունն իսկապես անհետացել է, եւ մենք բոլորս այլընտրանքային աղբյուրներ տրամադրելու գործընթացում ենք», - նշել է Լատվիայի վարչապետ Կրիսյանիս Կարինսը, իսկ Գերմանիայի էկոնոմիկայի նախարարն անդրադարձել է երկրում առկա վառելիքի պակասին:
Հայտնի է, որ, մինչեւ ռուս-ուկրաինական պատերազմը, ԵՄ գազի պաշարի մինչեւ 40 տոկոսը ներկրվում էր Ռուսաստանից, իսկ Գերմանիայի պարագայում՝ ընդհուպ մինչեւ 55 տոկոսը:
Այս պայմաններում ԵՄ երկրներում գնաճը անցել է 8 տոկոսը, իսկ տնտեսական աճը, ամենայն հավանականությամբ, կլինի 2,7 տոկոս:
