ՆԱՏՕ-ն պետք է դադարեցնի վարկաբեկել Չինաստանին, հինգշաբթի ճեպազրույցում ասել է Չինաստանի ԱԳՆ-ի պաշտոնական ներկայացուցիչ Չժաո Լիցզյանը՝ մեկնաբանելով դաշինքի նոր ռազմավարական հայեցակարգը։

Դիվանագետի խոսքով՝ ՆԱՏՕ-ի նոր ռազմավարական հայեցակարգն «անտեսում է փաստերը՝ սեւը սպիտակ ներկայացնելով», «վարկաբեկում է Չինաստանի արտաքին քաղաքականությունը, անպատասխանատու նկատողություններ է անում Չինաստանի նորմալ ռազմական զարգացման եւ ազգային պաշտպանության քաղաքականության մասին», ինչպես նաեւ քաջալերում է առճակատումը եւ սառը պատերազմի մենթալիտետն ու գաղափարաբանական կանխակալությունը։ «Չինաստանը լրջորեն անհանգստացած է այս առիթով եւ վճռականապես դեմ է դրան»,- ասել է Չժաո Լիցզյանը։

ՆԱՏՕ-ն նոր ռազմավարական հայեցակարգում իր հերթին հավաստիացնում է, որ Չինաստանի քաղաքականությունը հակասում է կազմակերպության շահերին եւ արժեքներին։

ՆԱՏՕ-ի մինչեւ 2030թ. նոր ռազմավարական հայեցակարգը հաստատվել է Մադրիդի գագաթաժողովում։ ՆԱՏՕ-ի ռազմավարական հայեցակարգը դաշինքի կարեւոր փաստաթուղթն է։ Դրանում սահմանվում են ՆԱՏՕ-ի արժեքները, կազմակերպության նպատակները, ինչպես նաեւ հավաքական գնահատական է տրվում անվտանգության ոլորտի իրավիճակին։ «Չինաստանը հավակնություններ ունի եւ իրականացնում է մեր շահերին, մեր անվտանգությանը եւ մեր արժեքներին հակասող քաղաքականություն»,- ընդգծվել է հայեցակարգում։

ՆԱՏՕ-ի կարծիքով՝ Չինաստանն օգտագործում է քաղաքական, տնտեսական եւ ռազմական միջոցների ամբողջությունը՝ «աշխարհում իր ներկայությունն ուժեղացնելու համար»։ Դաշինքում նշել են, որ Չինաստանի մտադրությունները, նրա ռազմական հզորացման նպատակները մնում են աղոտ։ «Նրա չարամիտ հիբրիդային գործողությունները կամ գործողությունները կիբեռտարածքում, թշնամական հռետորաբանությունը, ապատեղեկատվությունն ուղղված են ՆԱՏՕ-ի գծով դաշնակիցների դեմ եւ սպառնում են դաշինքի անվտանգությանը»,- նշվել է հայեցակարգում։