44-օրյա պատերազմում զոհված զինծառայողների ծնողները հավաքում են իրենց վրանները Ազատության հրապարակից: Այս մասին այսօր՝ հունիսի 30-ին, զոհված զինծառայողների հարազատների բողոքի ակցիայի ժամանակ՝ լրագրողների հետ զրույցում ասաց զոհված զինծառայողի ծնող Վիգեն Ազատյանը
«Մեր պայքարը սկսվեց Ազատության հրապարակից, տեղափոխվեց Ֆրանսիայի հրապարակ, ապա նորից՝ Ազատության հրապարակ: Այն, ինչ ուզում էինք անել վրանների միջոցով, արել ենք: Պայքարը շարունակվելու է, թե Դատախազությունում, թե ԱԱԾ-ում, թե փողոցում՝ ակցիաների տեսքով: Երեկ մի քանի հանդիպում ունեինք ոչ կուսակցական ընդդիմադիր գործիչների հետ եւ հանդիպումից հետո հասկացանք, որ վրանն իր առաքելությունը կատարել է»,- նշեց Ազատյանը:
Հիշեցնենք, որ զոհված զինծառայողների հարազատները բողոքի ակցիա էին անցկացնում Դատախազության շենքի առջեւ: Նրանք ցանկանում էին հանդիպել Գլխավոր դատախազ Արթուր Դավթյանի հետ: Նրանց պահանջն է, որ Դատախազությունը Քննչական կոմիտեում 308 հոդվածի երկրորդ մասի հատկանիշներով (պաշտոնական լիազորությունների չարաշահում, որն առաջացրել է ծանր հետեւանքներ) հարուցված գործը փոխանցվի ԱԱԾ-ին:
Նրանք պահանջում են նաեւ, որ գործը քննվի առերեւույթ պետական դավաճանության 299 հոդվածով, Նիկոլ Փաշինյանը կանչվի հարցաքննության եւ գործում ընդգրկվի որպես մեղադրյալ:
Ավելի ուշ Դատախազությունից առաջարկեցին վերեւ բարձրանալ երկու հոգով, սակայն ծնողները մերժել էին առաջարկը՝ պահանջելով նվազագույնը ութ ծնողների ներկայություն:
Դատախազությունից նշեցին, որ տասը ծնող կարող է բարձրանալ, սակայն առանց լրատվամիջոցների ներկայության եւ առանց հեռախոսների:
Հանդիպումից հետո՝ լրագրողների հետ զրույցում, ծնողները հայտնեցին, որ մեկ օր ժամանակ են տվել Արթուր Դավթյանին իրենց պահանջը կատարելու համար:
Արթուր Դավթյանին մեկ օր տվեցինք մեր պահանջը կատարելու համար. զոհված զինծառայողի հայր
