Հուլիսի 1-ին Ազգային ժողովի արտահերթ նիստին հայտարարվեցին Իշխան Սաղաթելյանին ԱԺ փոխխոսնակի պաշտոնից զրկելու, ինչպես նաեւ Վահե Հակոբյանի՝ որպես տնտեսական հարցերի մշտական խորհրդարանական հանձնաժողովի նախագահի լիազորությունները դադարեցնելու գաղտնի քվեարկության արդյունքները: Համապատասխան նախաձեռնությունը պատկանում էր իշխող «Քաղաքացիական պայմանագիր» կուսակցության խորհրդարանական խմբակցությանը։
Իշխան Սաղաթելյանին ԱԺ փոխխոսնակի պաշտոնից զրկելուն եւ Վահե Հակոբյանի՝ մշտական խորհրդարանական հանձնաժողովի նախագահի լիազորությունների դադարեցմանը միաձայն կողմ քվեարկեց 66 պատգամավոր:
Ընդդիմադիր պատգամավորներին պաշտոնից զրկելը միայն առաջին քայլն է: Իշխող ուժը դիտարկում է բացակայությունների համար եւս 10 պատգամավորի մշտական մանդատից զրկելու հնարավորությունը։
Խորհրդարանական ընդդիմությունը նիստին ներկա չէր:
