Կառուցապատվող բազմաբնակարան համալիրում իրականացված ստուգման արդյունքում Քաղաքաշինության, տեխնիկական և հրդեհային անվտանգության տեսչական մարմնի կողմից հայտնաբերվել է, որ շինարարական աշխատանքները իրականացվել են կոպիտ խախտումներով: Այս առնչությամբ կառավարությունն իր այսօրվա նիստում որոշեց լրացուցիչ փորձաքննություն կազմակերպելու նպատակով հատկացնել 3 մլն դրամ:
Որոշման հիմնավորման մեջ նշվում է, որ Տեսչական մարմնի կողմից արձանագրվել են մի շարք խախտումներ և խնդիրներ, այդ թվում՝ կառուցվող շինության կրող երկաթ բետոնե հեծաններում հայտնաբերվել են ուղղահայաց ճաքեր, որոնք կարող են ազդել շենքի կամ շինության ամրության, կայունության կամ հուսալիության վրա` առաջացնելով էական ռիսկեր և սպառնալ մարդկանց կյանքին և առողջությանը, ինչպես նաև՝շրջակա միջավայրին:
Հաշվի առնելով վերոգրյալը, ինչպես նաև կառուցված շենքերի սեյսմակայունությունը և անվտանգությունը ապահովելու անհրաժեշտությունը՝ անհրաժեշտ է իրականացնել կրկնակի ստուգում, որի շրջանակներում նախատեսվում է ձեռք բերել համալիր ուսումնասիրության ծառայություն՝տեխնիկական վիճակի հետազննություն և նախագծային լուծումների քաղաքաշինական պարզ փորձաքննություն:
Անվտանգության նկատառումներից ելնելով՝ Տեսչական մարմնի մասնագետները անհրաժեշտ են համարում նաև փորձաքննության ենթարկել վերահամաձայնեցված նախագծի՝ նախատեսվող սյուների կոնստրուկտիվ ուժեղացմանը վերաբերող մասերը։
Փորձաքննության ծառայության ձեռք բերման համար սահմանվել է 3 միլիոն ՀՀ դրամ նախահաշվային գին, որն առաջարկվում է հատկացնել Վարչապետի աշխատակազմին հատկացված միջոցների վերաբաշխման ճանապարհով, քանի որ 2022թ. տարեկան բյուջեով Տեսչական մարմնին փորձաքննությունների համար միջոցներ հատկացված չեն:
Նշվում է, որ ծառայության գնումը հրատապ է, քանի որ փորձաքննության արդյունքները անհրաժեշտ է ստանալ հնարավոր ամենասեղմ ժամկետներում՝ առկա ռիսկերին արագ արձագանքնելու նպատակով:
Հաշվի առնելով վերոգրյալը՝ Փորձաքննության իրականացման ծառայությունները նախատեսվում է ձեռք բերել «մեկ անձից գնում» ընթացակարգով: Մրցույթի անցկացմամբ ծառայության գնումը խնդրահարույց է շահերի հնարավոր բախման տեսանկյունից, քանի որ ծառայությունների մատուցման հայտ կարող է ներկայացնել նաև բազմաբնակարան համալիրը կառուցապտող ընկերության հետ փոխկապակցված ընկերություն՝ առաջարկելով ծառայությունների մատուցման զգալի ցածր գին՝արդյունքում տրամադրելով ոչ արժանահավատ Փորձաքննության եզրակացություն:
