News
Լրահոս
News
Չորեքշաբթի
Օգոստոս 10
USD
405.78
EUR
415.48
RUB
6.71
Տեսնել լրահոսը

Բրիտանական Anglo Asian Mining ընկերությունը (AAM՝ Ադրբեջանում ոսկու հանքավայրերի մշակման օպերատոր) Ադրբեջանում երեք նոր հանքավայրերի զարգացման ռազմավարություն կպատրաստի։ Այս մասին հայտնում է «Ինտերֆաքսը»։

«Երեքշաբթի օրը Ադրբեջանի Միլլի Մեջլիսը վավերացրել է AAM ընկերության կողմից Ադրբեջանում հանքաքարի հանքավայրերի յուրացման համար գործող Արտադրության բաշխման համաձայնագրի («ԱԲՀ») փոփոխությունները: Փոփոխությունները ներառում են ընկերության եւ Ադրբեջանի կառավարության միջեւ 2021 թվականի սեպտեմբերին ստորագրված հիմնական դրույթների մասին փաստաթուղթ, որը Anglo Asian Mining-ին իրավունք է տալիս մշակել ընդհանուր 882 ք/կմ տարածքով երեք նոր հատվածներ եւ Ադրբեջանի Քելբաջարի շրջանում (Հայաստանի հետ սահմանին) Սոյութլու պայմանագրային տարածքի նկատմամբ իրավունքներից հրաժարում»,- ասվում է AAM-ի տեղեկատվության մեջ։

Ինչպես հայտնում է «Ինտերֆաքս-Ադրբեջան»-ը, հղում անելով ընկերությանը, այս փաստաթղթի վավերացմամբ Anglo Asian Mining-ն ակնկալում է մոտ ապագայում ստանալ բոլոր առկա երկրաբանական տվյալները նոր ակտիվների վերաբերյալ։

«Դրանից հետո AAM-ն անմիջապես կսկսի առկա երկրաբանական տվյալների եւ նոր պայմանագրային տարածքների զարգացման հնարավորությունների մանրամասն վերլուծությունը: Վերլուծության ավարտից հետո ընկերությունը կհայտարարի նոր պայմանագրային հատվածների զարգացման իր ռազմավարության մասին»,- ընդգծել է ընկերությունը։

Ընկերությունը հիշեցնում է, որ ԱԲՀ-ի փոփոխությունները վավերացնելուց հետո AAM-ն այժմ Ադրբեջանում ունի ութ պայմանագրային տարածք՝ 2544 ք/կմ ընդհանուր մակերեսով:

«(…) Այս ձեռքբերումների նշանակությունը հնարավոր չէ գերագնահատել, քանի որ դրանք էապես մեծացրել են ակտիվների մեր բազայի հանքայնացումը եւ հեղափոխություն են իրականացրել մեր պորտֆելում: Այս նոր պայմանագրային տարածքները Anglo Asian-ի համար ճանապարհ են հարթում՝ միջին մակարդակի հանքարդյունաբերական ընկերություն դառնալու իր նպատակին հասնելու համար: Սրան ձգտելով՝ ընկերությունը ներկայումս մշակում է գործառնական աճի ռազմավարություն»,- ասել է Anglo Asian Mining-ի գլխավոր գործադիր տնօրեն Ռեզա Վեզիրին, որի խոսքերը մեջբերվում են մամուլի հաղորդագրության մեջ:

Երեք նոր պայմանագրային տարածքներից երկուսն իրենցից ներկայացնում են Ղարադաղի ծիրանաքարի մեծ հանքավայրը եւ հարակից Խարխարի պղնձի հանքավայրը: Երկու տարածքների ընդհանուր մակերեսը կազմում է 808 ք/կմ, դրանք սահմանակից են Գետաբեկի եւ Գոշի (Դաշքեսանի շրջանում) պայմանագրային տարածքներին։

Ըստ AAM-ի տեղեկատվության՝ Ղարադաղի ծիրանաքարի հանքավայրը, խորհրդային հաշվարկներով, պարունակում է 318 700 տոննա պղինձ՝, որն ընթացիկ գներով գնահատվում է ավելի քան 3 միլիարդ դոլար, մեկ տոննա հանքաքարում պղնձի պարունակությունը կազմում է 0,64 տոկոս։ Ընկերությունն ակնկալում է հանքաքար արդյունահանել բաց եղանակով։

Խարխարի հանքավայրը, ըստ նախնական տվյալների, զգալի ներուժ է դրսեւորել, ընկերությունը նախատեսում է պաշարների երկրաբանական գնահատում կատարել։

Երրորդ պայմանագրային տարածքը` Դեմիրլին, հարում է Ադրբեջանի Ղարաբաղի տնտեսական տարածաշրջանում գտնվող Ղըզըլբուլաղ պայմանագրային տարածքին (Տերտերի շրջանում), ինչը թույլ կտա ընդլայնել զարգացման գոտին դեպի հյուսիս-արեւելք: Այս պայմանագրային տարածքը ներառում է Դեմիրլիի պղնձամոլիբդենային հանքավայրը։ 2016 թվականի հունվարի դրությամբ չհաստատված տվյալներով հանքավայրում կա մոտ 275 000 տոննա պղինձ եւ 3200 տոննա մոլիբդեն։ «Դեմիրլիի հանքարդյունաբերական համալիրն արդեն կառուցվել է նոր պայմանագրային տարածքում, ուստի այս պայմանագրային տարածքում գործողությունների զարգացումը տեղի կունենա արագացված կարգով»,- ասվում է տեղեկատվության մեջ։

Ինչպես հաղորդվում է, Anglo Asian Mining-ը ներկայումս թանկարժեք մետաղներ է արդյունահանում Գետաբեկի եւ Գոշի պայմանագրային տարածքներից:

Պայմանագիրը կնքվել է 1997 թվականի օգոստոսի 21-ին եւ նախատեսում էր 6 հանքավայրերի զարգացում։ Պայմանագրում Ադրբեջանի մասնաբաժինը կազմում է 51 տոկս Anglo Asian Mining PLC-ինը՝ 49տոկոս։

Առաջին ոսկու արդյունահանումը սկսվել է 2009 թվականին Գետաբեկի հանքավայրից, արծաթի արդյունահանումը՝ 2010 թվականին։ 2013 թվականի սեպտեմբերին ընկերությունը սկսել է Գոշի պայմանագրային տարածքի մշակումը, գրում է աղբյուրը։

 

 

!
Այս նյութը հասանելի է նաև   Русский
Տպել
Ամենաշատ
Ֆոտոռեպորտաժներ