Եվրամիությունում նախատեսում են մշակել թվային եվրո, որը նախատեսված կլինի կանխիկ գումարը «լրացնելու» համար։ Այս մասին հայտարարել է Եվրահանձնաժողովի (ԵՀ) տնտեսական հարցերով անդամ Պաոլո Ջենտիլոնին, փոխանցում է «Ինտերֆաքսը»։
«Ինչ վերաբերում է թվային եվրոյին, թույլ տվեք նաեւ ընդգծել, որ մենք բոլորս համաձայն ենք, որ այն ոչ թե պետք է փոխարինի, այլ լրացնի կանխիկ գումարը»,- ասել է Ջենտիլոնին Եվրախմբի հանդիպումից հետո:
Նրա խոսքով՝ ԵՄ անդամ երկրների էկոնոմիկայի եւ ֆինանսների նախարարները հանդիպմանը կենտրոնացել են թվային եվրոյի մշակման անհրաժեշտության վրա՝ «ֆինանսական միջնորդության եւ կայունության վրա բացասական ազդեցություններից խուսափելու համար»։
Եվրոպական կենտրոնական բանկի (ԵԿԲ) նախագահ Քրիստին Լագարդը նախկինում հայտարարել է կրիպտոարժույթների կարգավորման անհրաժեշտության մասին, քանի որ դրանք ոչ մի բանով ամրապնդված չեն։ Նա հավելել է, որ թվային եվրոն կարող է արժանի փոխարինող լինել կրիպտոարժույթին, եւ ԵԿԲ-ն այն կարող է գործարկել առաջիկա չորս տարիների ընթացքում:
Ապրիլի սկզբին Եվրախորհրդարանն ընդունել է փողերի լվացման դեմ պայքարի օրինագիծ, ըստ որի կրիպտոարժույթով յուրաքանչյուր գործարք պետք է նույնականացվի։ Եվրախորհրդարանի տեղեկատվության համաձայն՝ կրիպտոընկերությունները, բացի իրենց հաճախորդներից, պետք է բացահայտեն եւ հետեւեն նաեւ թվային արժույթով գործարքների բոլոր մասնակիցներին: Միեւնույն ժամանակ օրենքը տարածվում է նաեւ ֆիզիկական անձանց մասնավոր դրամապանակների վրա։
