News
Լրահոս
News
Ուրբաթ
Հունիս 21
Տեսնել լրահոսը


Հայաստանի Ազգային անվտանգության ծառայության (ԱԱԾ) տնօրեն Արմեն Աբազյանը եւ Ռուսաստանի Արտաքին հետախուզության ծառայության տնօրեն Սերգեյ Նարիշկինը երկուշաբթի Երեւանում քննարկել են հետախուզական տեղեկատվության փոխանակման հնարավորությունը, փոխանցում է ՏԱՍՍ-ը։

«Այսօր բախտ ունեցա հանդիպելու ՀՀ վարչապետ Նիկոլ Փաշինյանի հետ։ Բացի այդ, աշխատանքային հանդիպում եմ ունեցել իմ գործընկեր, ԱԱԾ ղեկավար Արմեն Աբազյանի հետ։ Հանդիպումների եւ բանակցությունների ընթացքում բարձր գնահատական է տրվել մեր երկու երկրների ռազմավարական գործընկերության բովանդակությունը... Այդ համագործակցության մաս է կազմում հատուկ ծառայությունների փոխգործակցությունը, եւ այսօր իմ գործընկերոջ հետ քննարկել ենք հետախուզական տեղեկատվության փոխանակումը, արտաքին սպառնալիքների մի ամբողջ համալիրի բացահայտմանն ու կանխմանն ուղղված համատեղ գործողությունները: Սպառնալիքներ թե՛ Հայաստանի, թե՛ Ռուսաստանի նկատմամբ»,- բանակցություններից հետո լրագրողներին ասել է Նարիշկինը։

Նա հավելել է, որ կողմերն առաջիկա տարիների համատեղ աշխատանքային ծրագիր են մշակում։

Երկուշաբթի ավելի վաղ ՀՀ կառավարության մամուլի ծառայությունը հայտնել էր Նարիշկինի եւ Փաշինյանի հանդիպման մասին, որտեղ քննարկվել է տարածաշրջանային եւ միջազգային անվտանգության հետ կապված իրավիճակը։

«ՌԻԱ Նովոստի»-ի փոխանցմամբ՝ Սերգեյ Նարիշկինի այցը Հայաստան համընկել է ԿՀՎ տնօրեն Ուիլյամ Բերնսի՝ Հայաստան ժամանման հետ:

Նարիշկինի խոսքով՝ իր այցը ՀՀ մայրաքաղաք հաստատ կապված չէ ամերիկացի գործընկերոջ ժամանման հետ:

«Չեմ բացառում, որ, ահա, նրա այցն ուղիղ կապ ունի իմ այցի հետ»,- ասել է նա։

 

!
Այս նյութը հասանելի է նաև   Русский
Տպել
Ամենաշատ