Սիրիայի տարածքային ամբողջականության պահպանումը շատ կարեւոր է, եւ ցանկացած ռազմական հարձակում Սիրիայի հյուսիսում անպայման կվնասի Թուրքիային, Սիրիային եւ ամբողջ տարածաշրջանին, ինչպես նաեւ ձեռնտու կլինի ահաբեկիչներին: Այս մասին հայտարարել է Իսլամական հեղափոխության առաջնորդ այաթոլլա Սեյյեդ Ալի Խամենեին Թեհրանում Թուրքիայի նախագահ Ռեջեփ Թայիփ Էրդողանի հետ հանդիպմանը, փոխանցում է Mehr-ը։
«Այդ (հարձակումը) անպայման կվնասի Սիրիային, ինչպես նաեւ Թուրքիային եւ տարածաշրջանին։ Դա նաեւ թույլ չի տա իրականացնել Սիրիայի կառավարության քաղաքական միջոցառումները»,- ասել է Խամենեին։
Նրա խոսքով՝ «ահաբեկչությանը պետք է հակազդել, սակայն Սիրիայի վրա ռազմական հարձակումն օգուտ կբերի ահաբեկիչներին»։
Ընդգծելով, որ Իրանը Թուրքիայի եւ նրա սահմանների անվտանգությունն իր սեփական անվտանգությունն է համարում, այաթոլլա Խամենեին ասել է Էրդողանին. «Դուք պետք է նաեւ Սիրիայի անվտանգությունը ձեր անվտանգությունը համարեք։ Սիրիական հարցերը պետք է լուծվեն բանակցությունների միջոցով, իսկ Իրանը, Թուրքիան, Սիրիան եւ Ռուսաստանը պետք է լուծեն այս հարցը երկխոսության միջոցով»։
