Միացյալ Նահանգները եւ Հարավային Կորեան կբախվեն անվտանգության «աննախադեպ» խնդիրների, եթե չդադարեցնեն իրենց թշնամական ռազմական ճնշման քաղաքականությունը Փհենյանի ուղղությամբ, ներառյալ համատեղ զորավարժությունները։ Այս մասին Associated Press Television News-ին ասել է արտաքին գործերի նախարարության զինաթափման եւ խաղաղության վերլուծաբանական կենտրոնի գլխավոր տնօրենի տեղակալ Չխվե Ջինը։
«Եթե ԱՄՆ-ը եւ նրա դաշնակիցները ընտրություն կատարեն հօգուտ մեզ հետ ռազմական առճակատման, նրանք կբախվեն աննախադեպ անկայունության անվտանգության առումով»,- նախազգուշացրել է նա։
Նրա խոսքով՝ Վաշինգտոնի եւ Սեուլի համատեղ զորավարժություններն այս տարի Կորեական թերակղզին կանգնեցնում են պատերազմի շեմին։ Նա մեղադրել է ԱՄՆ-ի եւ Հարավային Կորեայի պաշտոնատար անձնաց դավադրության մեջ, որի նպատակն է ԱՄՆ-ի ռազմավարական միջուկային ուժերի ծավալումը համատեղ զորավարժություններում, որոնք սկսվելու են հաջորդ ամիս։
«ԱՄՆ-ը պետք է հիշի, որ իր հետ կվարվեն հավասարության հիմքով, եթե սպառնա մեզ միջուկային զենքով»,- ասել է Չխվեն։ Նրա խոսքով՝ Վաշինգտոնը պետք է հրաժարվի «թշնամանքի իր անաքրոնիկ եւ ինքնասպան քաղաքականությունից» Հյուսիսային Կորեայի հանդեպ, այլապես կբախվի «անցանկալի հետեւանքների»։
ԱՄՆ-ի եւ Հարավային Կորեայի մշտական զորավարժությունները Կորեական թերակղզում թշնամանքի հիմնական աղբյուրն են։