Կիոտոյի համալսարանի եւ Кajima ընկերության գիտնականները մտադիր են արհեստական ձգողականությամբ բազա հիմնել։ Ըստ նախագծի հեղինակների՝ սա գաղութացման ոլորտում ամենամեծ նախաձեռնությունն է, որը նմանը չունի։ Դրա իրականացումը կտեւի մոտ 100 տարի, իսկ առաջին նախատիպը Լուսնի վրա կկառուցվի միայն մինչեւ 2050 թվականը, հայտնում է The Next Web-ը։
Պրոֆեսոր Յոսուկե Յամասիկին եւ Kajima-ի գլխավոր ճարտարապետ Տակույա Օնոն ցուցադրել են տեսանյութ, թե ինչպիսի տեսք կունենա Լուսնի կամ Մարսի ամբողջական գաղութացումը:
Պլատֆորմը կկարողանա պտտվել բավականաչափ ուժով եւ արագությամբ՝ հասնելու այն ուժին, որն անհրաժեշտ է Երկրի ձգողականությունը մոդելավորելու համար:
Յամասիկին բացատրել է, որ գաղափարը լուծում է տիեզերքի յուրացման հետ կապված պոտենցիալ բազմաթիվ խնդիրներ: Արհեստական ձգողականության օգնությամբ գաղութարարները կկարողանան խուսափել մկանների ատրոֆիայից, ոսկրային ամրության կորստից եւ այլ խնդիրներից, որոնք տիեզերագնացները հանդիպում են ՄՏԿ-ում։