Հայաստանի ՀՆԱ-ում օտարերկրյա ուղղակի ներդրումների մասնաբաժնի ցուցանիշները շատ ավելի ցածր են, քան մրցակից երկրներինը։ Այնուամենայնիվ, այս ցուցանիշները կարելի է կրկնապատկել եւ բավականին արագ: Այս մասին հուլիսի 22-ին հայտարարեց միջազգային փորձագետ Հենրի Լոնդելը` ելույթ ունենալով «Հայաստանում գործարար միջավայրի բարելավում» USAID ծրագրի կողմից մշակված ներդրումային բարեփոխումների ճանապարհային քարտեզի շնորհանդեսին։
Լոնդելն անմիջական մասնակցություն է ունեցել այս ճանապարհային քարտեզի մշակմանը:
Նա նշեց, որ Հայաստանը վերջին տարիներին լուրջ առաջընթաց է գրանցել ինչպես մարդկային կապիտալի զարգացման, այնպես էլ նյութատեխնիկական զարգացման ուղղությամբ։ Սակայն օտարերկրյա ուղղակի ներդրումների ներգրավման առումով կառավարության գործողությունները բավարար չեն եղել։
«Հայաստանը վերջին տարիներին այնքան լավ չի գործել, ինչպես կարող էր։ Երկրի ՀՆԱ-ում ուղղակի ներդրումների մասնաբաժինը շատ ավելի քիչ է, քան կարող էր լինել։ Այս առումով Հայաստանը հետ է մնում մրցակից երկրներից»,- պարզաբանեց փորձագետը։
Նա նաեւ նշեց, որ ՀՆԱ-ում օտարերկրյա ուղղակի ներդրումների տոկոսը կազմել է միջինը 1,7։ Այս ցուցանիշը, ըստ Հենրի Լոնդելի, կարող է առնվազն կրկնապատկվել։ Նա վստահ է, որ ցուցանիշները բավականին արագ հնարավոր կլինի կրկնապատկել։ Ճիշտ է, եթե կառավարությունը ներդրումներ ներգրավելու համար կարողանա կազմակերպել արդեն առկա ինստիտուտների՝ դեսպանատների, տեղական ինքնակառավարման մարմինների, ինչպես նաեւ գործակալությունների աշխատանքը։
