ԵՄ անդամ երկրները պետք է սկսեն նախապատրաստվել COVID-19 համավարակի նոր ալիքի աշնանը եւ ձմռանը, ասել է Առողջապահության եւ սննդամթերքի անվտանգության հարցերով եվրահանձնակատար Ստելլա Կիրիակիդեսը՝ նշելով բռնկումների «անհանգստացնող աճը», հաղորդում է Reuters-ը։
«Ցավոք, համավարակը տագնապալի աճ է ցույց տվել մի քանի երկրներում»,- ասել է նա:
«Վերջին երկու ամիսների ընթացքում մենք պատրաստվել ենք աշնանն ու ձմռանը՝ քաջ գիտակցելով, որ համավարակի հաջորդ ալիքը չի կարող եւ չպետք է ավելի ծանրաբեռնի մեր տնտեսությունը կամ մեր հասարակությունը, հատկապես այն ժամանակ, երբ նրա վրա ազդում է Ուկրաինայի պատերազմը եւ գնաճը»,- ասել է նա։
Նա հայտնել է, որ Եվրոպական հանձնաժողովը անդամ երկրներին խնդրել է արագացնել պատվաստումը 60 տարեկանից բարձր մարդկանց եւ խոցելի խմբերի համար: «Այս ամիսները պետք է լինեն նախապատրաստական ամիսներ… Որ մեր առողջապահական համակարգերը պատրաստ լինեն հնարավոր նոր ալիքների, որոնք, օրինակ, կարող են զուգակցվել սեզոնային գրիպի հետ»,- ասել է նա: