ԵԱՀԿ Խորհրդարանական վեհաժողովը գրեթե ամբողջ ուշադրությունը կենտրոնացրել է Ուկրաինայի խնդրի վրա։ Կոնֆլիկտային իրավիճակներն այլ կետերում եւ տարածաշրջաններում, ինչպես նաեւ՝ ԵԱՀԿ տարածքում, հաճախ անտեսվում էին: Այս մասին հուլիսի 26-ին ԱԺ-ում լրագրողների հետ հանդիպման ժամանակ, ներկայացնելով պատվիրակության գործունեության մասին զեկույցը, հայտարարեց ԱԺ արտաքին հարաբերությունների մշտական հանձնաժողովի նախագահ, ԵԱՀԿ ԽՎ-ում հայաստանյան պատվիրակության ղեկավար, իշխող «Քաղաքացիական պայմանագիր» խմբակցության պատգամավոր Էդուարդ Աղաջանյանը:
Պատգամավորի խոսքով՝ այս տարվա փետրվարից ԵԱՀԿ ԽՎ օրակարգում որեւէ այլ թեմա չի եղել։ Այդ իմաստով, ինչպես նշեց Աղաջանյանը, չափազանց դժվար էր գործընկերների ուշադրությունն այլ թեմաների եւ խնդիրների վրա հրավիրել։ Մասնավորապես, խոսքը հարավկովկասյան տարածաշրջանում ընթացող գործընթացների մասին էր։
«ԵԱՀԿ ԽՎ ամառային նստաշրջանի ընթացքում, որը տեղի ունեցավ հունիսի վերջին, հայկական պատվիրակությունն առաջարկեց որոշակի փոփոխություններ կատարել կազմակերպության քաղաքական հանձնաժողովի վերջնական բանաձեւում։ Դրանք վերաբերում էին ղարաբաղյան հակամարտության լուծման, Լեռնային Ղարաբաղում հայկական մշակութային ժառանգության պահպանման եւ գերիներին վերադարձնելու անհրաժեշտությանը։ Այնուամենայնիվ, փոփոխություններն այդպես էլ չհաստատվեցին եւ չարձանագրվեցին փաստաթղթի վերջնական տարբերակում»,- ասաց հայկական պատվիրակության ղեկավարը։
Աղաջանյանն ընդգծեց, որ ԵԱՀԿ ԽՎ ներկայացուցիչների այդպիսի պահվածքն անընդունելի է եւ դատապարտման է արժանի: Ի դեպ, այդ մասին նրանք խոսել են նաեւ լիագումար նիստերի ժամանակ։ Նման մոտեցումը, ինչպես նշեց Էդուարդ Աղաջանյանը, բազմաթիվ հարցեր է առաջացնում հայկական կողմի մոտ: