Իրանի ԱԳՆ-ն երկխոսությունն Իրաքի խնդիրների լուծման լավագույն միջոցն է համարում։ Այս մասին հայտարարել է Իրանի ԱԳՆ պաշտոնական ներկայացուցիչ Նասեր Քանաանին՝ մեկնաբանելով Իրաքում տեղի ունեցած վերջին իրադարձությունները, որտեղ քաղաքական առաջնորդ Մուկթադա աս-Սադրի կողմնակիցները խորհրդարանում նստացույց անցկացրեցին, փոխանցում է Tasnim-ը։
«Իրաքը հզոր երկիր է եւ մեր հիմնական հարեւանը։ Բնականաբար, մենք ուշադիր հետեւում ենք Իրաքում ընթացող իրադարձություններին։ Իրանը միշտ ընդգծել է իր գլխավոր հարեւանի խաղաղության եւ անվտանգության կարևորությունը եւ կարծում է, որ Իրաքի անվտանգությունը հավասար է Իրանի եւ տարածաշրջանի անվտանգությանը»,- ասել է նա։
«Մենք ընթացող իրադարձությունները ներքաղաքական տարաձայնությունների հետեւանք եւ Իրաքի ներքին գործերի մաս ենք համարում: Կարծում ենք, որ իրաքյան քաղաքական շարժումները, կուսակցություններն ու կազմավորումները կարող են հաղթահարել ստեղծված իրավիճակը այդ երկրի Սահմանադրության եւ իրավական մեխանիզմների շրջանակներում»,- ասել է Քանաանին: «Իրանի Իսլամական Հանրապետությունը միշտ հարգել և հարգում է Իրաքի ժողովրդի ընտրությունը եւ ընդգծում է, որ երկխոսությունն այս երկրի ներքին խնդիրները լուծելու լավագույն միջոցն է»,- հավելել է նա։
Իրանի ներկայացուցիչը նաեւ վստահություն է հայտնել, որ իրաքցի ժողովուրդը կկարողանա անցնել այս փուլն իր «հասունության» եւ «իրաքյան առաջնորդների խոհեմության» շնորհիվ՝ արաբական երկրում կայունություն եւ հանգստություն ապահովելու համար։
Սադրի հազարավոր կողմնակիցներ ներխուժել են Բաղդադում ամրացված Կանաչ գոտի՝ մեկ շաբաթվա ընթացքում երկրորդ անգամ գրավելով խորհրդարանի դատարկ շենքը։
