ՌԴ-ն ակտիվ ներդրում ունի Հայաստանի եւ Ադրբեջանի միջեւ խաղաղության պայմանագրի նախապատրաստման գործում։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նա նշել է, որ ՌԴ ԱԳՆ հատուկ ներկայացուցիչ Իգոր Խովաեւը կանոնավոր խորհրդակցություններ է անցկացնում կողմերի հետ՝ ընդհանուր լեզու գտնելու, խաղաղ համաձայնագրի փոխընդունելի հիմնարար սկզբունքների եւ պարամետրերի հասնելու համար։
«Հայ-ադրբեջանական սահմանի սահմանազատումը նաեւ Ռուսաստանի միջնորդական ջանքերի կարեւոր մաս է։ Մոսկվայի խորհրդատվական դերն այս գործընթացում արձանագրված է 2021 թվականի նոյեմբերի 26-ի Սոչիի բարձր մակարդակի եռակողմ հայտարարության մեջ։ Ինչպես հայտնի է, մայիսի վերջին ստեղծվել է համապատասխան երկկողմ հանձնաժողով, եւ երկու երկրների սահմանին տեղի են ունեցել Հայաստանի եւ Ադրբեջանի ներկայացուցիչների առաջին ճանաչողական հանդիպումները։ Մեր կողմից մենք միշտ պատրաստ ենք ընդունել մեր հայ եւ ադրբեջանցի ընկերներին Ռուսաստանի տարածքում։ Համոզված ենք, որ Ռուսաստանի եզակի, մասնագիտական կարողությունները հետխորհրդային տարածքում սահմանազատման առումով կարող են էապես ամրապնդել անվտանգությունը հայ-ադրբեջանական սահմանին եւ ընդհանուր առմամբ տարածաշրջանում։ Մենք ելնում ենք նրանից, որ Երեւանն ու Բաքուն կորոշեն որոշակի միջոցառումների անցկացման կոնկրետ ժամկետներ»,-ասել է Զախարովան։