Իշխանությունները փորձում են արգելել սփյուռքահայ գործիչների մուտքը Հայաստան, որպեսզի ջրբաժան անցկացնեն Հայաստանի և Սփյուռքի միջև ։ Այս մասին այսօր՝ օգոստոսի 3-ին, ԱԳՆ շենքի դիմաց բողոքի ակցիայի ընթացքում ասաց «Երիտասարդի ձայնը» նախաձեռնության հիմնադիր Հովհաննես Հարությունյանը:
«Սա խայտառակություն է հայ ժողովրդի և Հայաստան-Սփյուռք-Արցախ եռամիասնության համար: Բոլորս էլ հիշում ենք՝ երբ այս իշխանությունները եկան, հենց սկզբից հայաստանցիներ և արցախցիներ բաժանարար գիծ սկսեցին անցկացնել՝ փորձելով պառակտել Հայաստանն ու Արցախը»,- ասաց նա:
Հովհաննես Հարությունյանի դիտարկմամբ՝ յուրաքանչյուր հարցում իշխանության եւ Թուրքիայի ու Ադրբեջանի դիրքորոշումները համընկնում են։ Այս դեպքում էլ Ադրբեջանը աչքի է ընկել իր հայտնի «սև ցուցակով», որտեղ հիմնականում ընդգրկվում էին այն անձինք, որոնք արցախանպաստ, հայանպաստ գործողություններ էին իրականացնում:
«Փաստ է, որ Ադրբեջանի նույն «սև ցուցակը» առկա է նաև Հայաստանի Հանրապետությունում: 90-ականներին էլ մի իշխանություն կար, որը մտածում էր, թե կասեցնելով դաշնակցականների գործունեությունը, ինչ-որ բանի կհասնի: Վերջում ժամանակը ցույց տվեց՝ որտեղ հայտնվեց այդ իշխանությունը և որտեղ՝ Դաշնակցությունը»,- եզրափակեց Հովհաննես Հարությունյանը:
Հիշեցնենք, որ ՀՅԴ Հայաստանի երիտասարդական միությունը բողոքի ակցիա է կազմակերպել Հայաստանի ԱԳՆ-ի դիմաց՝ Ընդդեմ սփյուռքահայերի Հայաստան մուտք գործելու ապօրինի արգելքի:
Վերջին օրերին երեք սփյուռքահայ դաշնակցական գործիչների՝ ՀՅԴ Բյուրոյի անդամ, Ֆրանսիայի հայկական կազմակերպությունների համակարգող Մուրադ Փափազյանին, ՀՅԴ Նիդեռլանդների Հայ Դատի ատենապետ Մասիս Աբրահամյանին և «Գարեգին Նժդեհ» երիտասարդական միության անդամ Սյունե Աբրահամյանին թույլ չի տրվել մուտք գործել Հայաստան։