Գերմանիան ցանկանում է, որ Եվրամիությունում անդամ երկրների պարտքի վերաբերյալ կանոններն ավելի խստորեն կիրառվեն, հայտնում է Reuters լրատվական գործակալությունը՝ հղում տալով կառավարության աղբյուրներին։
«Կանոնները պետք է ավելի հստակ սահմանվեն, այլ ոչ թե սահմանվեն անհասանելի նպատակներ, որոնք կարող են տարբեր կերպ մեկնաբանվել», - ասել է Գերմանիայի կառավարության աղբյուրը`նշելով, որ նպատակը դեֆիցիտը կրճատելն է, որը կտրուկ աճել է կորոնավիրուսային համաճարակի ժամանակ, ինչպես նաեւ պահուստներ կուտակել՝ ապագա ճգնաժամերին պատրաստվելու համար:
Գերմանիայի կառավարությունը ցանկանում է առաջնորդություն ստանձնել ԵՄ պարտքի կանոնների բարեփոխման շուրջ քննարկումներում՝ մատնանշելով Արժույթի միջազգային հիմնադրամի, ՏՀԶԿ-ի եւ Եվրոպական հանձնաժողովի առաջարկությունները՝ ծախսերը սահմանափակելու վերաբերյալ:
ԵՄ գործող կանոնները սահմանափակում են նոր պարտքը մինչեւ արտադրանքի 3 տոկոսը, իսկ ընդհանուր պարտքը մինչեւ 60 տոկոս, սակայն դրանք, համաճարակի հետեւանքով, մնում են կասեցված:
Գերմանիայի ֆինանսների նախարար Քրիստիան Լինդներն ասել է, որ ԵՄ անդամ պետություններն իրենց տարեկան կառուցվածքային դեֆիցիտը պետք է սկզբունքորեն պահեն արտադրանքի 0,5 տոկոսից ցածր, կամ գոնե շարժվեն դեպի այդ նպատակը։
«Իմ առաջարկն է այդ միջնաժամկետ բյուջեի թիրախները դարձնել պարտադիր», - ասել է նա Handelsblatt թերթին։
Պաշտոնական Բեռլինի առաջարկները ամբողջացնող փաստաթուղթը ընդգծում է նաեւ շարունակական ներդրումների կարեւորությունը աճի եւ կլիմայի համար, սակայն ասվում է, որ այն ավելի անհրաժեշտ է դարձնում պետական ֆինանսների բարելավումը: