Այս շաբաթ հյուսիսարեւմտյան եւ կենտրոնական Եվրոպայում եւս մի կիզիչ շոգ կգրանցվի՝ լրացուցիչ ճնշում գործադրելով մայրցամաքի գերծանրաբեռնված էներգետիկ ենթակառուցվածքների վրա, գրում է Bloomberg-ը։
Սպասվում է, որ ուրբաթ Մեծ Բրիտանիայում, Գերմանիայում եւ Ֆրանսիայում ջերմային ալիքները գրեթե 36 աստիճանի կհասնեն, հայտնում է Maxar Technologies LLC-ն: Շոգը կմեծացնի հովացման անհրաժեշտությունը եւ կխորացնի արդեն չոր պայմանները, որոնք վնասակար են մշակաբույսերի համար, եւ ջրի օգտագործման սահմանափակումներ կներդնի:
Էքստրեմալ շոգն արդեն վնասն է հասցրել մայրցամաքում. Ֆրանսիայում գրանցվել է ռեկորդային ամենաչոր հուլիսը, իսկ Անգլիայում՝ ամենաչորը վերջին 90 տարվա ընթացքում, ինչն ընդգծում է կլիմայի տաքացման ազդեցությունը կենսական ենթակառուցվածքների վրա: Հռենոս գետի ջրի մակարդակը, որը կարեւոր զարկերակ է ապրանքների փոխադրման համար, այնքան ցածր է, որ ջրային ճանապարհի որոշ հատվածներում առեւտուրը կարող է դադարեցվել:
Շոգը հրդեհների պատճառ է դարձել Լոնդոնի մերձակայքում, եւ նախազգուշացումներն առ այն, որ երկաթուղային գծերը կարող են շեղվել, ստիպել են էլեկտրակայաններին հզորության ցածր մակարդակներով աշխատել՝ գերտաքացումից խուսափելու համար: Ֆրանսիայում կարգավորիչ մարմինները Electricite de France SA-ին հինգ ատոմակայաններին տաք ջուրը գետերը լցնելու ժամանակավոր թույլտվություն են տվել, ինչը կարող է խախտել բնապահպանական չափանիշները:
Թեեւ ջերմաստիճանը հազիվ թե հասնի հուլիսին սահմանված ռեկորդային մակարդակին, ջերմային ալիքը գալիս է պատմական էներգետիկ ճգնաժամի ֆոնին, քանի որ Ռուսաստանը կրճատում է բնական գազի մատակարարումները տարածաշրջան: Ճգնաժամը նպաստել է բուռն աճող գնաճին, ինչը կարող է ռեցեսիա առաջացնել Եվրոպայի որոշ խոշորագույն տնտեսություններում: Գերմանիայում եւ Ֆրանսիայում էլեկտրաէներգիայի գները վերջին օրերին աճել են՝ ռեկորդային առավելագույնի հասնելով։
Maxar-ի կանխատեսմամբ՝ մինչեւ ուրբաթ Լոնդոնում շոգը 31.5 աստիճանի կհասնի, իսկ Ֆրանկֆուրտում՝ 32.5 աստիճանի:
