Ռուսաստանը եւ Ուկրաինան ընդունել են հունգարական նավթագազային MOL կոնցեռնի եւ Բրատիսլավայում գտնվող եւ նրան պատկանող Slovnaft նավթավերամշակող կոմբինատի առաջարկին՝ «Դրուժբա» նավթատարով ռուսական նավթի տարանցման համար վճարելու վերաբերյալ։ Այս մասին, հղում կատարելով Slovnaft-ի աղբյուրներին, տեղեկացրել է սլովակյան Pravda թերթի կայքը։

Նավթի մղումը «Դրուժբա»-ի հարավային խողովակով պետք է վերականգնվի առաջիկա օրերին։ Թերթի տեղեկացմամբ՝ MOL-ը վճարել է Ուկրաինայով գազի տարանցման համար, ինչը ձեռնտու է Կիեւի իշխանություններին։

CTK տեղեկատվական գործակալությունը երեքշաբթի տեղեկացրել էր, որ MOL-ը եւ Slovnaft-ը, որը ամենամեծ նավթավերամշակող կոմբինատներից մեկն է Կենտրոնական Եվրոպայի երկրներում, նախաձեռնել են բանակցություններ ռուսական եւ ուկրաինական կողմերի հետ՝ «Դրուժբա» նավթատարի հարավային ճյուղով նավթի մատակարարումների վերսկսման մասին։ Ներկա պահին Slovnaft-ը էներգահումք է մատակարարում լրիվ ծավալով, որն ստանում է սլովակյան նավթապահեստարաններից, տեղեկացրել է ՏԱՍՍ-ը։

Սլովակիան, ինչպես մինչ այդ հայտարարել էր հանրապետության փոխվարչապետ եւ էկոնոմիկայի նախարար Ռիխարդ Սուլիկը, հում նավթի պաշարներ է կուտակել, որոնք կապահովեն երկրի տնտեսության անխափան գործունեությունը 126 օրվա ընթացքում։