Այս շաբաթ Միացյալ Նահանգները կարեւոր քայլ կատարեց դեպի քաղաքացիական պատերազմ, եւ պարզ չէ, թե ինչպես կարող է հետքայլ անել։ ՀԴԲ-ի խուզարկությունը նախկին նախագահ Դոնալդ Թրամփի Մար-ա-Լագոյի տանը դարձել է աներեւակայելի տեսարան ամերիկյան քաղաքականության մեջ, գրում է Globe and Mail-ը։
«Իրադարձությունն ինքնին ցնցող է։ Դեռեւս ոչ ոք հստակ չգիտի, թե ինչու է ՀԴԲ-ն որոշել խուզարկել Մար-ա-Լագոն, սակայն Արդարադատության դեպարտամենտը պետք է հրամանը հանձներ դաշնային դատավորին եւ նշեր, թե ինչ առարկաներ են նրանք փնտրում եւ ինչ հանցագործություններ են կապված այդ օբյեկտների հետ։
Այս պահին միանգամայն հավանական է թվում, որ նախկին նախագահը կհայտնվի բանտում։ Բայց նույնիսկ այն մարդիկ, որոնք տենչում են դա այն պահից, երբ Թրամփն իջավ վերելակով՝ հանրության ծափահարությունների ներքո, պետք է խորը շունչ քաշեն եւ հարցնեն իրենց՝ ի՞նչ հետեւանքներ կունենա դա, արժե՞ արդյոք:
Շատ ձախականների համար այս պահը չափազանց քաղցր է այն չվայելելու համար: Մար-ա-Լագոյի խուզարկությունը գանգստերական ֆիլմի մի մաս է, որտեղ ֆեդերալները ներխուժում են դռնից ներս եւ ավարտին հասցնում անպատժելիությունը: Բայց ձախականներին այնքան դժվար է բացատրել, թե Ամերիկան ինչ վտանգի մեջ է գտնվում, քանի որ աջականներն իրենց նույնքան ճնշված եւ հուսահատ են զգում, որքան ձախականները։
Fox News-ը ցուցաբերել է սովորական զսպվածություն Մար-ա-Լագոյի խուզարկության վերաբերյալ՝ ՀԴԲ-ն համեմատելով «գեստապոյի» հետ եւ նախազգուշացնելով «կանխարգելիչ հեղաշրջման» մասին։ Եվ խոսքը միայն Թրամփի մեդիա էկոհամակարգի մասին չէ: Ներկայացուցիչների պալատի փոքրամասնության առաջնորդ Քեւին ՄքՔարթին ռեյդը որակել է որպես «զինված քաղաքականացման անտանելի վիճակ»:
Այլ երկրներում, իհարկե, նախկինում էլ նախագահները բանտարկված են եղել։ Իսրայելը, Ֆրանսիան եւ Հարավային Կորեան դատապարտել են նախկին առաջնորդներին։ Բայց այս երկրներից եւ ոչ մեկում դատական համակարգը լեգիտիմության ճգնաժամի մեջ չէր, ինչպես այժմ գտնվում է ԱՄՆ Գերագույն դատարանը: Երկիրն իրենից ներկայացնում է բարդ կասկադային համակարգ։ Կողմերից ոչ մեկ չի կարծում, որ ամերիկյան որեւէ իրավական ինստիտուտ քաղաքականությունից դուրս է։ Ընտրվելուց հետո մյուս կողմը լիովին իրավասու կզգա Արդարադատության դեպարտամենտը որպես զենք օգտագործելու: Այս շաբաթվա ռեյդը միայն նպաստեց միջկուսակցական ազգային ինստիտուտների ոչնչացմանը, եւ հենց նրանք են խանգարում ժողովրդավարություններին սահել դեպի ինքնավարություն:
ԱՄՆ-ն հասել է մի կետի, երբ նրանք այլեւս լավ տարբերակներ չունեն։ Եթե Արդարադատության նախարարությունը մեղադրանք չներկայացնի Թրամփին, ապա դա վտանգի տակ է դնում օրենքի գերակայությունը։ Եթե նրանք մեղադրանք ներկայացնեն Թրամփին, ապա նրանք վտանգում են երկիրը։
Ուրախանալով Թրամփի հնարավոր ձերբակալությունից՝ ուժերը, որոնք հավատում են ամերիկյան ժողովրդավարությանը, չպետք է այս պահը շփոթեն համակարգի գործունեության կամ նորմալ քաղաքական կյանքին վերադառնալու հետ։ Սա ճիշտ չէ։ Նախկին նախագահի ձերբակալությունը աղետ է, գուցե անհրաժեշտ աղետ, բայց, այնուամենայնիվ, աղետ։
Ձախականները պետք է ընդունեն այն իրավիճակը, որում հայտնվել են։ Նրանց երկրի գրեթե կեսն այլեւս չի հավատում, որ օրենքի առջեւ հավասարությունը նույնքան կարեւոր է, որքան սեփական կուսակցությունը, որը վերահսկում է կառավարական ապարատը: Եվ նրանց արձագանքը իրավապահների ցանկացած գործողության, որը հակադրվում է իրենց կուսակցական շահերին, գնալով դառնում է ավելի կատաղի եւ վրեժխնդիր: Նրանք կարող են ապրել կամ ֆունկցիոնալ ժողովրդավարության, կամ Միացյալ Նահանգներում, բայց ոչ երկուսում միաժամանակ: Ընտրության ժամանակը գալիս է ավելի շուտ, քան որեւէ մեկը սպասում է»,-գրում է թերթը։