Samsung-ի բջջային բաժնի ղեկավար Ռո Թաե Մունը հայտարարել է հարավկորեական վաճառողի՝ մոնոբլոկ սմարթֆոններից աստիճանաբար հրաժարվելու պլանների մասին՝ շեշտը դնելով ծալովի գաջեթների վրա, հայտնում է The Korea Herald-ը։
Նշվում է, որ որոշումն ընդունվել է պրեմիում դասի սարքերի սեգմենտի աճի տեմպերի դանդաղմանն ու աշխարհում մակրոտնտեսական անկայունությանն ի պատասխան։ Թոփ մենեջերը նշել է, որ մինչեւ 2025 թ. Galaxy Z Flip եւ Galaxy Z Fold ճկուն էկրանով սմարթֆոնները կկազմեն Samsung սմարթֆոնների ընդհանուր թվի կեսը։
Խոսքը ֆլագմանների մասին է, որոնց թվում են Galaxy S22, S22 Plus, S22 Ultra մոնոբլոկները։ Մունը վստահություն է հայտնել, որ ծալովի գաջեթները նոր ստանդարտ կդառնան շարժական սարքերի համար։
Counterpoint Research-ի տվյալներով՝ Samsung-ը մատակարարումների ծավալով առաջ է անցնում իր գլխավոր մրցակցից՝ ամերիկյան Apple ընկերությունից։ Սակայն հարավկորեական արտադրողի ազդեցությունը պրեմիում սեգմենտում ընկել է 3 կետով՝ մինչեւ 17 տոկոս, իսկ Apple-ն աճել է 5 կետով՝ մինչեւ 60 տոկոս։