«Սուրմալու» առեւտրի կենտրոնում ժամը 13։30-ի դրությամբ հայտնաբերվել է 6 դի, 10 տուժած դուրս է բերվել փլատակների տակից։ Այս մասին այսօր՝ օգոստոսի 15-ին, լրագրողների հետ զրույցում ասաց Փրկարար ծառայության փրկարար ուժերի վարչության պետի տեղակալ, գնդապետ Վարդազարյանը։
Անդրադառնալով այն դժգոհություններին, թե փրկարարական աշխատանքները դանդաղում են, Վարդազարյանն ասաց. «Փրկարարական աշխատանքները չեն դանդաղում։ Այստեղ հաշվի են առնվում ռիսկերը։ Կան անվտանգության կանոններ, պիտի վերացնենք ռիսկերը, որ կարողանանք գործել»։
Նա նշեց, որ շինության փլուզման վտանգ կա. «Երկաթե կոնստրուկցիաներ կան կախված, դրանք պետք է հեռացնենք, որպեսզի կարողանանք կատարել փրկարարական աշխատանքներ։ Բացի դրանից տրակտորն աշխատելուց, փորելուց հնարավոր է՝ դիակները վնասի. փորձում ենք խուսափել նման դեպքերից»։