Microsoft-ի պաշտոնական բլոգում հայտնվել է գրառում, որը պատմում է մի երգի մասին, որը բառացիորեն «սպանել» է նոութբուքերը։ Այս պատմությունը տեղի է ունեցել Windows XP-ի ժամանակներում:

Խոշոր արտադրողներից մեկը նկատել է, որ Ջանեթ Ջեքսոնի Rhythm Nation տեսահոլովակը ձայնարկելուց հետո մի շարք նոութբուքեր դուրս են եկել շարքից՝ դրանց կոշտ սկավառակները կոտրվել են: Ընդ որում, խափանվել է ոչ միայն սարքը, որի վրա միացվել է հոլովակը, այլ նաեւ այդ սենյակում գտնվող մյուս համակարգիչները։

Ինչպես պարզվել է, դրա պատճառը երգի ձայնային հաճախականություններն են, որոնք ռեզոնանսի մեջ են մտել 5400 պտ/րոպե արագությամբ կոշտ սկավառակների որոշ մոդելների հետ։ Արտադրողը գտել է այս խնդիրը լուծելու միջոցը՝ ավելացնելով հատուկ ֆիլտր, որը «հեռացրել է» անցանկալի հաճախականությունները՝ նոութբուքերը պաշտպանելու համար:

Rhythm Nation թրեքը Ջանեթ Ջեքսոնի չորրորդ ստուդիական «Janet Jackson's Rhythm Nation 1814» ալբոմի մի մասն է։ Ռեժիսոր Դոմինիկ Սենայի նկարահանած տեսահոլովակի պրեմիերան կայացել է 1989 թվականին։