ՊԵԿ կայքից հանվել են ներկրվող ավտոմեքենաների համար սահմանված հսկիչ գները, իսկ վաղը դրանք արդեն թանկանալու են: Այս մասին, այսօր՝ օգոստոսի 31-ին, ՊԵԿ-ի դիմաց բողոքի ակցիայի ժամանակ նշեցին ավտոներկրող քաղաքացիները:
«Մենք մեքենաներ ունենք դրսում, կանխավճարները թողել ենք, որ մեքենան Վրաստանում սարքեն, բերենք, հիմա ինչի՞ եք բարձրացնում գները: Մենք մեր փողով ենք աշխատում, բայց մարդիկ կան, որ փող չունեն, տունն են գրավ դրել, էստեղից-էնտեղից փող է պարտքով վերցրել, որ մի երկու կոպեկ փող աշխատի: Հիմա այդ մարդիկ տուժելու են:
Հիմա ես վրացի նորոգողների մոտ կանխավճար եմ թողել, որ մեքենան սարքեն, գնամ բերեմ: Հիմա եթե ասեմ, որ էստեղ թանկացնում են, նա էլ կասի՝ կներես, ես մեքենան այլ մարդու կծախեմ, կանխավճարն էլ կկորի:
Հիմա մաքսատան պետը նստած որոշում է, թե ինչքան լինի հսկիչ գինը: Այդ ինչպես է որոշում, որ 17 հազարանոց հսկիչ գինը դարձնում է 24 հազար, այդ ո՞ր կայքից են իրենք օգտվում»,-ասաց ավտոներկրողներից մեկը:
Մեկ ուրիշն էլ նշեց. «Էս մի շրջանն է, որ ռուսները գալիս են, Ղազախստանից էլ մարդ չի կարողանում գալ: Հիմա որ մաքսային գինը բարձրացնեն, ռուսներն էլ էլ չեն գա: Ասում են՝ արդեն մաքսազերծումը մեզ մոտ ու ձեզ մոտ նույնն է, էլ ինչու եմ գալիս Հայաստանից առնեմ: Ես գնացել եմ Գյումրի, ազատ հյուրանոց չկա, համարը 30-35 հազար է դարձել ու այդ բոլորը մեր հաշվին է, ավտոյի գործ անողների հաշվին: Ռուսները գալիս են, տուրիստները գալիս են, մեր հայրենակիցները ՌԴ-ից գալիս են, մեքենաները առնում են, հանգստանում են, պետությանը փող են տալիս: Հիմա այդ ամենը չի լինի»:
