Եվրամիությունում զենքի պաշարները պակասում են, քանի որ անդամ երկրները շարունակում են զենք ու զինամթերք ուղարկել Ուկրաինա: Այս մասին հայտարարել է ԵՄ դիվանագիտության ղեկավար Ժոզեպ Բորելը` կոչ անելով ԵՄ երկրներին ավելի լավ համակարգել ռազմական տեխնիկայի իրենց ծախսերը, փոխանցում է AP-ն։
«Անդամ երկրների մեծ մասի ռազմական պաշարները չէի ասի սպառվել են, բայց պակասել են մեծ չափով, քանի որ մենք մեծ ներուժ ենք ապահովում ուկրաինացիների համար»,- Եվրախորհրդարանում բանավեճի ժամանակ ասել է Բորելը: «Դրանք պետք է համալրել։ Համալրելու լավագույն միջոցը դա միասին անելն է: Ավելի էժան կլինի»,- ասել է նա։
Անցյալ շաբաթ Չեխիայի Հանրապետությունում կայացած հանդիպման ժամանակ ԵՄ պաշտպանության նախարարները քննարկել են ռազմական տեխնիկայի եւ ռեսուրսների ավելի լավ համախմբման ուղիները, ինչպես նաեւ մեծածախ զինամթերք եւ սպառազինություն գնելու ուղիները, ինչպիսիք են ՀՕՊ համակարգերը, որոնց կարիքը Ուկրաինան դեռ ունի:
Բորելը զգուշացրել է, որ եթե անդամ երկրները նույն կերպ շարունակեն ընդլայնել իրենց ռազմական հնարավորությունները, «արդյունքը կլինի փողերի մեծ վատնումը»։
Բորելը նաեւ ափսոսանք է հայտնել այն կապակցությամբ, որ, իր կարծիքով, ԵՄ-27 երկրները բաց են թողել ուկրաինացի զինվորականներին մարզելու հնարավորությունը մեկ տարի առաջ՝ փետրվարին Ռուսաստանի գործողությունների մեկնարկից շատ ամիսներ առաջ:
«Ցավոք, մենք դա չարեցինք, եւ այսօր ափսոսում ենք դրա համար։ Ցավում ենք, որ անցած տարվա օգոստոսին այս խնդրանքին չհետեւեցինք, չկատարեցինք այն»,- ասել է նա։ Եթե ԵՄ-ն այդ ժամանակ արձագանքեր, ասել է Բորելը, «մենք ավելի լավ վիճակում կլինեինք»:
