Ոստիկանության Եղեգնաձորի բաժնում տեղեկություններ էին ստացվել, որ Վայոց ձորի մարզի Եղեգիս գյուղի 55-ամյա մի բնակիչ ապօրինի թմրամիջոց է ձեռք բերում և իրացնում։

Ոստիկանությունից NEWS.am-ին հայտնում են, որ ձեռնարկված միջոցառումներն արդյունք տվին սեպտեմբերի 2-ին։ Այդ օրը Եղեգնաձորի ոստիկանները Եղեգիս գյուղում ձերբակալեցին 25-ամյա մի երիտասարդի։ Անձնական խուզարկությամբ հայտնաբերվեց մարիխուանայի նմանվող զանգված՝ 7 գրամից ավելի քաշով։

Հետագա միջոցառումների արդյունքում պարզվեց, որ 25-ամյա երիտասարդը թմրամիջոցը 20 հազար դրամով ձեռք էր բերել Եղեգիս գյուղի 55-ամյա բնակչից։ Նույն օրը նա ևս հայտնաբերվեց ու ձերբակալվեց, ապա իրավապահներին ներկայացրեց կանեփի բույսեր, որոնցից պատրաստել էր թմրամիջոց։

Հանգամանքները պարզվում են նախաձեռնված քրեական վարույթի շրջանակներում։