Բաքվում տեղի է ունեցել համատեղ միջոցառում՝ Ադրբեջանի, Ռուսաստանի եւ Իրանի պաշտոնատար անձանց մասնակցությամբ։ Միջոցառումը նվիրված էր «Հյուսիս-Հարավ» տրանսպորտային միջանցքի զարգացման հեռանկարներին։ Միջոցառման ժամանակ Ադրբեջանի, Իրանի եւ Ռուսաստանի միջեւ առաջին եռակողմ հանդիպման արդյունքների հիման վրա ստորագրվել է Բաքվի հռչակագիրը տրանսպորտային միջանցքի զարգացման վերաբերյալ։

Ինչպես տեղեկացրել է АPA-ն, հռչակագիրը ստորագրել են Ադրբեջանի փոխվարչապետ Շահին Մուսթաֆաեւը, Իրանի ճանապարհների եւ քաղաքային զարգացման նախարար Ռուստամ Ղասեմին եւ Ռուսաստանի փոխվարչապետ Ալեքսանդր Նովակը։

Հռչակագրի համաձայն՝ կողմերը համագործակցության պատրաստակամություն են հայտնել ենթակառուցվածքի եւ տրանսպորտային հնարավորությունների գնահատման եւ ուսումնասիրման ոլորտում՝ միջանցքը լիարժեք օգտագործելու նպատակով։ Կողմերն ընդգծել են համատեղ աշխատանքային խմբի ստեղծման կարեւորությունը եւ մտադիր են առաջին նիստն անցկացնել առաջիկա մեկ ամսում։

Բացի այդ, կողմերը հայտարարել են մեկ ամսվա ընթացքում «Ռեշտ-Աստարա» երկաթուղային նախագծի վերաբերյալ համաձայնագիր պատրաստելու եւ մինչեւ 2022թ. վերջ բանակցություններ սկսելու մտադրության մասին։