Սեպտեմբերի առաջին կեսի վերջին Պակիստանում եւս մի քանի ջրհեղեղ է տեղի ունեցել։ Աղետի վնասը կարող է 30 միլիարդ դոլար կազմել, հայտնում է Bloomberg-ը:
«Պակիստանում ջրհեղեղներն արդեն 1486 մարդու կյանք են խլել, տուժել է ընդհանուր 33 միլիոն քաղաքացի: Միլիոնավոր տներ ավերվել են, վնասը կարող է 30 միլիարդ դոլարի հասնել»,- ասվում է հոդվածում։
Հարեւան Հնդկաստանի Մադհյա Պրադեշ նահանգում հորդառատ անձրեւների կանխատեսումները եւս մտահոգիչ են։ Վատ եղանակը կարող է բարձրացնել Պակիստանի որոշ գետերի ջրի մակարդակը եւ ավելի մեծ ջրհեղեղներ առաջացնել մինչեւ շաբաթ օրը՝ սեպտեմբերի 17-ը:
«Հարավասիական երկրի ավելի քան մեկ երրորդը, որն արդեն բախվել է արտարժույթի պահուստների նվազման եւ վերջին տասնամյակների ամենաբարձր գնաճին, ջրի տակ է անցել: Սինդում բրնձի բերքի ավելի քան 70 տոկոսը վնասվել է»,- նշում է Bloomberg-ը։
Այս բոլոր գործոնները կարող են Պակիստանի տնտեսությունը դեֆոլտի հասցնել: Երկրի իշխանություններն արդեն Արժույթի միջազգային հիմնադրամից 1.16 մլրդ դոլարի չափով ֆինանսական օգնություն են ստացել՝ լայնածավալ ջրհեղեղների բացասական հետեւանքները կանխելու համար։
Օգոստոսի 28-ին Պակիստանի աղետների կառավարման ազգային վարչության վերլուծաբանները տվյալներ են հրապարակել, որոնք ցույց են տալիս, որ ջրհեղեղի զոհերի թիվը երկրում գերազանցել է 1000-ը, տուժել է եւս 1527 քաղաքացի։
