Ադրբեջանի կողմից Հայաստանի ինքնիշխան տարածքի դեմ ագրեսիայի հետեւանքով զոհվել է պայմանագրային զինծառայող Անուշ Աբետյանը։

36-ամյա Անուշ Աբետյանը երեք անչափահաս երեխա ուներ՝ 16 տարեկան դուստր եւ 15 ու 4 տարեկան որդիներ։ Անուշը ծնունդով Արմավիրի մարզի Հոկտեմբերյան քաղաքի Մրգաշատ գյուղից էր։

Ութ ամիս առաջ Անուշը որոշել էր անցել պայմանագրային զինծառայության, իսկ մինչ այդ զբաղվել էր հողագործությամբ։ 

«Ամուսնանալուց տարիներ անց Անուշն ընտանիքի հետ տեղափոխվել էր Երեւան, իսկ ութ ամիս առաջ՝ Ջերմուկ։ Հենց այդ ժամանակ էլ ծառայության էր անցել Զինված ուժերում՝ որպես պայմանագրային զինծառայող եւ ծառայել Ջերմուկի զորամասում։ Ինքը միշտ է սիրել զինվորականի մասնագիտությունը, միշտ է դրան ձգտել։ Մենք դժվարությամբ համակերպվեցինք իր որոշմանը, ցանկանում էինք հակառակում համոզել, բայց արդրդվելի էր․ շատ էր սիրում հայրենիքը։ Ասում էր՝ չեք պատկերացնում ինչ լավն է մեր Ջերմուկի հողն ու ջուրը, ինչ հեքիաթային էր Շուշին։ Ինքը շատ երջանիկ էր զգում իրեն իր աշխատանքում»,- NEWS.am-ի հետ զրույցում պատմեց Անուշ Աբետյանի քույրը՝ Նարինե Սարգսյանը։

Անուշի երեխաներն այժմ Մրգաշատ գյուղում են։ Նրանց խնամում են Անուշի ծնողները եւ եղբայրը։ Քրոջ խոսքով՝ Անուշի դուստրը մտադիր է ապագայում զբաղվել մայրիկի աշխատանքով։

Անուշ Աբետյանը հերթապահության համար դիրքեր պետք է բարձրանար սեպտեմբերի 24-ին, սակայն բարձրացրել է սեպտեմբերի 13-ի գիշերը. «Իր հետ վերջին անգամ սեպտեմբերի 13-ին խոսեցի, շատ անտրամադիր էր, ասաց՝ հետո կզանգեմ, բայց այդպես էլ չզանգեց, համարն էլ կարճ ժամանակ անց դարձավ անհասանելի։ Մեր տեղեկություններով՝ Անուշը սեպտեմբերի 14-ի ցերեկն է զոհվել։ Ծանր մարտեր են ընթացել, ինքը բեկորային վնասվածքներ ու այրվածքներ ուներ։ Հավանաբար այրվել է Ջերմուկի անտառներում բռնկված հրդեհի հետեւանքով։ Մարմինը դժվարությամբ ենք ճանաչել՝ ոտքի սպիով, որը որոշ ժամանակ ինքը ստացել էր դիրքերում»,- նշեց Նարինե Սարգսյանը։

Անուշ Աբետյանի հուղարկավորությունը տեղի կունենա վաղը՝ սեպտեմբերի 17-ին, Մրգաշատի զինվորական պանթեոնում։

Հիշեցնենք, որ սեպտեմբերի 13-ին՝ ժամը 00:05-ից, Ադրբեջանի ԶՈՒ ստորաբաժանումները սահմանի ողջ երկայնքով հրետանային միջոցներից, խոշոր տրամաչափի հրաձգային զինատեսակներից սկսել էին ինտենսիվ կրակ վարել հայկական դիրքերի ուղղությամբ՝ կիրառելով նաեւ ԱԹՍ-ներ: Հակառակորդը հարվածում էր թե՛ ռազմական, թե՛ քաղաքացիական օբյեկտներին։

Պաշտպանության նախարարության հաղորդմամբ՝ սեպտեմբերի 14–ին, ժամը 20։00–ից բոլոր ուղղություններով կրակը գրեթե դադարել է, էական միջադեպեր չեն արձանագրվել։ Սեպտեմբերի 16-ի ժամը 09:00-ի դրությամբ՝ հայ-ադրբեջանական սահմանին իրադրության փոփոխություն չի արձանագրվել:

Սեպտեմբերի 14–ին վարչապետ Նիկոլ Փաշինյանը ԱԺ–Կառավարություն հարցուպատասխանի ժամանակ հայտարարել էր, որ այդ պահի դրությամբ՝ ադրբեջանցիները Հայաստանից օկուպացրել են 10 քառակուսի կմ։

Սեպտեմբերի 16–ի դրությամբ հայկական կողմն ունի հաստատված 135 զոհ։ «Ցավոք մենք գիտենք, որ այդ թիվը դեռեւս վերջնական չէ: Ունենք նաեւ բազմաթիվ վիրավորներ»,- Կառավարության նիստին հայտարարել է վարչապետ Նիկոլ Փաշինյանը։