Ադրբեջանի ագրեսիայի արդյունքում Գեղարքունիքի մարզում վնասվել են Կութ, Նորաբակ, Սոթք, Վերին Շորժա, Ազատ բնակավայրերը. մնացած բնակավայրերի վնասի չափերը ճշգրտվում են: Այս մասին այսօր՝ սեպտեմբերի 17-ին լրագրողների հետ զրույցում նշեց Վարդենիսի փոխհամայնքապետ Կարեն Մկրտչյանը:
«Այսօրվանից իրականացվում են չափագրման աշխատանքները, պարզվում են վնասների չափերը, որ արագացված տեմպերով փոխհատուցվեն ու վերականգնվեն բնակչությանը հասցված վնասները: Իհարկե, կառավարությունը փոխհատուցել է եւ այս պահի դրությամբ նշածս բնակավայրերում տեղի են ունենում հետազոտական աշխատանքներ, թե ինչ վնասներ են պատճառվել»,-ասաց նա:
Հարցին, թե ինչպես է լուծվում տարհանված բնակիչներին տեղավորելու հարցը, քանի որ կան բնակիչներ, որ որեւէ տեղ չունեն բնակվելու, փոխհամայնքապետը պատասխանեց. «մարզպետի գլխավորությամբ հենց կրակոցների օրվանից սկսած բոլոր բնակիչներին ցուցաբերվել է պատշաճ օգնություն: Որոնց կարողացել ենք, տարհանել ենք, ոմանք տեղափոխվել են ապաստարաններ: Որոնք տեղափոխվել են Վարդենիս համայնքից հեռու՝ Մարտունի,. Գավառ, Երեւան, նման խնդիր չի եղել: Համեյանդեպս, այն բնակիչները, որոնք դիմել են մեզ կամ մենք ունեցել ենք տեղեկություն, բոլորին ցուցաբերել ենք անհրաժեշտ օգնություն»:
Նա նաեւ հավելեց, որ Սոթքում եւ Կութում վաղվանից կսկսվեն էլեկտրականության վերականգնման աշխատանքները: Վաղը կամ մյուս օրը հոսանքի հարցը կլուծվի. «Սոթքում նաեւ գազատարն է վնասվել: Մնացած բնակավայրերի մասով տվյալները ճշգրտվում են: Ամենաշատը տուժել է Սոթքը»,-ասաց նա:
Փոխհամայնքապետը հերքեց տեղեկությունները, թե իրենք ասել են բնակիչներին՝ դուրս եկեք. «Բացարձակապես նման բան չկա: Խուճապի մի մատնվեք, մնացեք տեղերում, շարունակեք բնականոն կյանքը»:
Նա վստահեցրեց, որ բնակիչները վախեցած չեն, մարտական են տրամադրված. «Որքան շուտ լուծխվի փոխհատուցումների հարցը, այնքան ժողովուրդն ավելի է ոգեւորվում, որ գան ու շարունակեն իրենց բնականոն կյանքը»: