Հայ Առաքելական եկեղեցուն հողահարկի եւ գույքահարկի գծով արտոնությունների տրամադրումը «հակասում են ՀՀ Սահմանադրությամբ, ՀՀ քաղաքացիական օրենսգրքով, «Խղճի ազատության եւ կրոնական կազմակերպությունների մասին» ՀՀ օրենքով ամրագրված կրոնական կազմակերպությունների իրավահավասարության սկզբունքին»: Սա մեջբերում է ՀՀ արդարադատության նախարարության կողմից ՀՀ կառավարությանը ներկայացրած տեղեկանքից, որը զետեղված է կառավարության պաշտոնական կայքէջում:
Հիշեցնենք, որ ՀՀ կառավարության օգոստոսի 25-ի նիստում հավանության է արժանացել «Գույքահարկի մասին», «Հողահարկի մասին» եւ «Հողային օրենսգրքում» լրացումներ կատարելու մասին օրենսդրական փաթեթը: Դրանով նախատեսվում է Հայ Առաքելական Սուրբ Եկեղեցուն (Մայր Աթոռ Սուրբ էջմիածնին) պատկանող գույքը եւ հողամասերը ազատել գույքահարկից ու հողահարկից:
Տարածքային կառավարման նախարարության ներկայացրած տեղեկանքի համաձայն` Հայ Առաքելական եկեղեցին առանց այն էլ հարկ չի վճարում, ուստի պետական կամ համայնքային բյուջեների վրա դա որեւէ ազդեցություն չի թողնի:
Սակայն արդարադատության նախարարությունը հիշեցրել է, որ 2010 թ. դեկտեմբերին Ստրասբուրգում կայացած Վենետիկյան հանձնաժողովի 85-րդ լիագումար նիստում քննարկվել են Հայաստանում «Խղճի ազատության եւ կրոնական կազմակերպությունների մասին» ՀՀ օրենքում փոփոխություններ եւ լրացումներ կատարելու մասին օրինագծերը:
Այնուհետեւ Վենետիկյան հանձնաժողովն իր եզրակացությունում նշել է, որ կրոնական կազմակերպությունների խտրականությունը կարող է արտահայտվել տնտեսական արտոնություններ տրամադրելու ձեւով կամ արտոնյալ կարգավիճակ սահմանելու միջոցով: Ուստի արդարադատության նախարարությունն առաջարկել է օրենքների նախագծերի քննարկումների ժամանակ հաշվի առնել Վենետիկյան հանձնաժողովի եզրակացության դրույթները:
