«Եռաբլուր» զինվորական պանթեոնից բերման ենթարկված ծնողները դուրս են եկել ոստիկանական բաժանմունքներից, բոլորի վերաբերյալ կազմվել է վարչական արձանագրություն՝ ոստիկանական օրինական պահանջին չենթարկվելու պահանջով։ Այս մասին, այսօր՝ սեպտեմբերի 21-ին, լրագրողների հետ զրույցում նշեց փաստաբան Վահան Հովհաննիսյանը:

«Մենք կպայքարենք արձանագրությունների դեմ։ Ոստիկաններն իրենց որեւէ պահանջ չեն ներկայացրել։ Իմ վստահորդների իրականացրած ակցիան խիստ իրավական էր։ «Եռաբլուրը» այս մարդկանց տունն է, եւ իրենք ունեն լիարժեք իրավունք իրենց կարծիքով իրենց որդիների մահվան մեջ մեղավոր անձին թույլ չտալ մտնել իրենց տուն։ Ոստիկանները նաեւ առանց հիմնավորելու նրանց ավտոմեքենաներն այս կայանատեղիից դուրս են բերել։ Միայն հետո, երբ ծնողներից մեկն առեւանգման վերաբերյալ հաղորդում ներկայացրեց Ոստիկանություն, պարզվեց, որ մեքենաները տեղափոխել են»,- նշեց Հովհաննիսյանը։

Հիշեցնենք, որ այսօր՝ սեպտեմբերի 21-ի վաղ առավոտից ոստիկանական հսկայական ուժեր են կենտրոնացել «Եռաբլուր» զինվորական պանթեոնում: Առավոտյան ժամը 6-ից այստեղ են մեծ թվով անվտանգության աշխատակիցներ:  Կարմիր ու սեւբերետավորները շղթա էին կազմել: Ինչ-որ պահի կարմիր բերետավորները սկսեցին քաշքշելով բերման ենթարկել զոհված զինծառայողների ծնողներին, այդ թվում կանանց, որոնք եկել էին այստեղ թույլ չտալու, որպեսզի Անկախության օրվա տոնի կապակցությամբ Նիկոլ Փաշինյանն այցելի «Եռաբլուր»:

Ոստիկանները խոչընդոտեցին նաեւ լրագրողների եւ օպերատորների աշխատանքը՝ նրանց հրելով իջեցնելով «Եռաբլուրի» եկեղեցու հատվածից:

Ոստիկանությունից փոխանցում են, որ «Եռաբլուր» զինվորական պանթեոնից բերման է ենթարկվել 37 քաղաքացի։