Կատարը ցանկացել է կենտրոնանալ Եվրոպա էներգակիրների մատակարարման երկարաժամկետ պայմանագրերի վրա՝ էներգաճգնաժամի ֆոնին։ Այս մասին տեղեկացրել է Bloobmerg-ը՝ հղում կատարելով երկրի արտաքին գործերի նախարար Մոհամեդ բեն-Աբդուլռահման Ալ Թանիին։
«Կատարը պատրաստ է օգնել թեթեւացնել էներգակիրների մատակարարման հետ կապված ճգնաժամը, բայց ցանկանում է կենտրոնանալ երկարաժամկետ պայմանագրերի վրա»,- նշել է Ալ Թանին։
Սեպտեմբերի կեսին ֆրանսիական Le Point ամսագրին տված հարցազրույցում երկրի էմիր, շեյխ Թամիմ բեն Համադ Ալ Թանին հայտարարել էր, որ մատակարարումները Կատարից չեն կարող փոխարինել ռուսական գազին, որի կարիքն ունեն եվրոպական երկրները։ Պետության ղեկավարի խոսքով՝ Կատարը ցանկանում է օգնել Եվրոպային եւ մտադիր է առաջիկա տարիներին գազ մատակարարել եվրասիական մայրցամաքի այդ հատված։
Մինչ այդ Bloobmerg գործակալությունը, հղում կատարելով իր աղբյուրներին, գրել էր, որ Դոհան որոշել է պնդել 20 տարի ժամկետով Եվրամիություն հեղուկացված բնական գազի (ՀԲԳ) «կոշտ» մատակարարումների հարցում։ Ինչպես այն ժամանակ նշվել էր հրապարակման մեջ, եվրոպական երկրներն այդ որոշումը շատ կոշտ էին համարել։