Ղրղըզստանը նախաձեռնել է Տաջիկստանը ՀԱՊԿ-ի կազմից հանելու հարցը։ Այս մասին նախօրեին հայտարարել է Անվտանգության խորհրդի քարտուղար Մարատ Իմանկուլովը, տեղեկացրել է Economist.kg-ն։
«Մասնակից պետությունների միջեւ առաջացող հարցերը պետք է լուծվեն խաղաղ ճանապարհով։ Եթե որեւէ մեկը փորձում է ուժ կիրառել, ապա մենք առաջարկում ենք հանել նրան կազմակերպությունից։ Ինչի՞ է դա պետք, եթե դառնում ես ՀԱՊԿ-ի անդամ եւ սպասում պաշտպանություն արտաքին սպառնալիքից, բայց ստանում ես հակամարտություն կազմակերպության ներսում։ Ժամանակն է, որ մեր երկրները վերանայեն կանոնադրության որոշ հատվածները, որոնք այդպիսի պահեր են նախատեսում»,- ասել է Անվտանգության խորհրդի քարտուղարը։
Իմանկուլովն ընդգծել է, որ Ղրղըզստանը պնդում է, որպեսզի բանակցություններ վարվեն տաջիկական կողմի հետ։
«Տաջիկստանը մեզ համար ոչ թե թշնամական, այլ բարեկամական երկիր է։ Մենք դարերով ապրում ենք կողք կողքի։ Տաջիկ ժողովուրդն այստեղ կապ չունի։ Նրանք իրավիճակի, իրականացվող քաղաքականության եւ քաղաքական գործիչների պատանդն են։ Քանի դեռ այդ քաղաքականությունը Ղրղըզստանի հանդեպ չի վերանայվի, ոչ մի լավ բան չի լինի, նման հակամարտությունները կկրկնվեն»,- ասել է Մարատ Իմանկուլովը։
Հիշեցնենք, որ սեպտեմբերի 14-ին զինված բախումներ էին սկսվել ղրղըզա-տաջիկական սահմանին։ Սեպտեմբերի 16-ին ակտիվ գործողությունները սրացել էին սահմանի ամբողջ պարագծով, սկսվել էր Բաթքենի շրջանի բնակիչների տարհանում։ Ղրղըզստանի Հանրապետության Ազգային անվտանգության պետական կոմիտեն տեղեկացրել էր տաջիկական կողմից ծանր զրահատեխնիկայի, համազարկային կրակի հրթիռային համակարգերի եւ ավիացիայի օգտագործման մասին։