Ղրղզստանն ու Ուզբեկստանը պատրաստ են համաձայնագիր ստորագրել սահմանի վերաբերյալ։ «Մենք ունենք պատմական առաքելություն ավարտին հասցնել Ղրղզստանի եւ Ուզբեկստանի պետական սահմանի սահմանազատման եւ սահմանագծման հարցը»,- ասել է Ազգային անվտանգության պետական կոմիտեի նախագահ Կամչիբեկ Տաշիեւը՝ բացելով երկու երկրների կառավարական հանձնաժողովների համատեղ նիստը։
Ազգային անվտանգության պետական կոմիտեի ղեկավարը հույս է հայտնել, որ այսօրվա համատեղ նիստի արդյունքներով մոտ ապագայում նախագահների ստորագրման համար Ղրղզստանի եւ Ուզբեկստանի պետական սահմանի վերաբերյալ համաձայնագիր կնախապատրաստվի մնացած հատվածների վերաբերյալ, փոխանցում է 24.կգ-ն։
«Այսօր Ղրղզստանը եւ Ուզբեկստանը մերձավոր հարեւաններ են, իսկական ընկերներ եւ ռազմավարական գործընկերներ։ Ղրղզստանը լիովին պատրաստ է Ուզբեկստանի հետ քաղաքական, առեւտրային, տնտեսական, ներդրումային, տրանսպորտային, միջտարածաշրջանային, մշակութային եւ հումանիտար կապերի հետագա ընդլայնմանը»,- ասել է Կամչիբեկ Տաշիևը։
Իր հերթին, Ուզբեկստանի վարչապետ Աբդուլլա Արիպովը հաստատել է ուզբեկական կողմի լիակատար վճռականությունը՝ համաձայնեցնելու պետական սահմանի սահմանազատման և սահմանագծման պայմանագրի նախագիծը։
«Երկու հանրապետությունների կառավարական պատվիրակությունները քրտնաջան աշխատել են, ծանր աշխատանք է տարվել ղրղզա-ուզբեկական պետական սահմանի մնացած հատվածների համակարգման ուղղությամբ։ Վստահ եմ, որ սահմանազատման գործընթացի ավարտը եւս մեկ անգամ կհաստատի մեր հավերժական բարեկամության եւ իսկապես եղբայրական հարաբերությունների անխախտությունը»,- ասել է Աբդուլլա Արիպովը։
