Ռուսաստանի նախագահ Վլադիմիր Պուտինը ստորագրել է հրամանագրեր Զապորոժիեի եւ Խերսոնի մարզերի տարածքներն անկախ ճանաչելու մասին, տեղեկացրել է «Ъ»-ը։
Երկու հրամանագրերում նշվել է, որ մարզերի անկախության ճանաչման որոշումն ընդունվել է «միջազգային իրավունքի համընդհանուր սկզբունքների եւ նորմերի, ինչպես նաեւ ՄԱԿ Կանոնադրությունում ամրագրված ժողովուրդների իրավահավասարության եւ ինքնորոշման սկզբունքին համապատասխան»։ Երկու հրամանագրերն ուժի մեջ են մտնում հրապարակման պահից։
Վլադիմիր Պուտինը փետրվարի 22-ին ճանաչել էր Դոնեցկի եւ Լուգանսկի ժողովրդական հանրապետությունների (ԴԺՀ եւ ԼԺՀ) անկախությունը։ Սեպտեմբերի 23-27-ին ԴԺՀ-ում եւ ԼԺՀ-ում, ինչպես նաեւ Զապորոժիեի եւ Խերսոնի մարզերում տեղի է ունեցել Ռուսաստանի կազմի մեջ մտնելու հանրաքվե։ Տեղի ընտրական հանձնաժողովների տվյալներով՝ ԴԺՀ-ում ՌԴ-ին միանալու օգտին քվեարկել է քվեարկության մասնակիցների 99,23 տոկոսը, ԼԺՀ-ում՝ 98 տոկոսը, Խերսոնի մարզում՝ 87, Զապորոժիեում՝ 93 տոկոսը։