Ամերիկացի սենատորներ Ջիմ Ռիշը (հանրապետական, Այդահոյի նահանգ) եւ Շելդոն Ուայթհաուսը (դեմոկրատ, Ռոդ Այլենդի նահանգ) կարծում են, որ Ուկրաինային զգալի ֆինանսական օգնություն կարելի է ցուցաբերել այն ակտիվներով, որոնք կբռնագանձվեն ՌԴ Կենտրոնական բանկից, եւ ՌԴ անկախ այլ ակտիվներով։ Սենատորներն առաջարկում են 2023 ֆինանսական տարվա համար ԱՄՆ պետական պաշտպանության մասին օրենքին ավելացնել օրինագիծ ռուսական էլիտաների, օլիգարխների մասին (REPO Act 2022), տեղեկացրել է «Голос Америки»-ն։

«Հանրային հաշվետվողականությունը ցույց է տալիս, որ 300 մլրդ դոլար գումարի ռուսական ակտիվներ են սառեցվել ամբողջ աշխարհում։ Դա շատ ավելին է, քան այն բոլոր միջոցների գումարը, որոնք առգրավվել եւ բռնագանձվել են ռուս օլիգարխներից,- ասել է սենատոր Ռիշը։- Հաշվի առնելով Ուկրաինայում Ռուսաստանի անօրինական պատերազմի դաժանությունը՝ ճիշտ կլինի, եթե այդ միջոցները բռնագանձվեն եւ ուղղվեն Ուկրաինային օգնելուն, որպեսզի հաղթի այս պատերազմում եւ վերականգնի իր երկիրը»։

Սենատոր Շելդոն Ուայթհաուսն, իր հերթին, կարծում է, որ ԱՄՆ-ը պետք է Վլադիմիր Պուտինին հասկացնի, որ եթե նա շարունակի Ուկրաինա ներխուժումը, ապա ի պատասխան կստանա ֆինանսական հետեւանքներ»։ «Այս միջոցը ուժեղ ու պարզ ազդանշան կլինի»,- ասել է Ուայթհաուսը։

Սենատորներ Ռիշը եւ Ուայթհաուսն առաջարկում են.

- ԱՄՆ նախագահին տալ ԱՄՆ-ում սառեցված ռուսական անկախ ակտիվները բռնագանձելու իրավունք,

- պահանջել ֆինանսական հաստատություններից՝ տեղեկացնել իրենց մոտ պահվող ՌԴ բոլոր անկախ ակտիվների մասին,

- ստեղծել Ուկրաինայի աջակցության հիմնադրամ եւ պահանջել, որպեսզի ցանկացած բռնագանձված անկախ միջոց ուղղվի հօգուտ Ուկրաինայի,

- ԱՄՆ պետքարտուղարին տալ բռնագանձված միջոցներն Ուկրաինա ուղարկելու լիազորություններ,

-  ԱՄՆ պետդեպարտամենտի պատժամիջոցների համակարգման վարչությանը տրամադրել լրացուցիչ ռեսուրսներ արտասահմանում գործընկերների եւ դաշնակիցների հետ աշխատելու համար՝ այլ երկրներում ռուսական լրացուցիչ անկախ ակտիվների բռնագանձման նպատակով։