«Ճշմարտություն սերունդների համար» նախաձեռնությունը տարածել է հայտարարություն, որտեղ ասված է.
«Երեկ՝ հոկտեմբերի 5-ին Ազգային ժողովի ամբիոնից Նիկոլ Փաշինյանն արեց հերթական հակամարդկային հայտարարությունը, որից հետո վարչապետի պաշտոնում նրա մնալը չի տեղավորվում որևէ տրամաբանության մեջ:
Նա հայտարարեց, թե իբր Արցախի Ադրբեջանի կազմում լինելն ամրագրել էին դեռ 2007-ին ՀՀ նախկին արտգործնախարար Վարդան Օսկանյանը և ՀՀ երկրորդ նախագահ Ռոբերտ Քոչարյանը, ստորագրելով Մադրիդյան սկզբունքները:
Այնուհետև նա շեշտեց. «Արդյոք մենք պայթարել ենք այդ որոշումների դեմ, որպեսզի այդ որոշումները կարողանանք հետ պտտել: Այո, պայքարել ենք, և բոլորդ էլ տեսել, թե ինչպես ենք պայքարել: Արդյոք հաջողել ենք: Ոչ, չենք հաջողել: Չենք հաջողել: և ժամանակն է խոստովանել, որ չենք էլ հաջողելու»:
44-օրյա պատերազմում, դրանից հետո տեղի ունեցած զինված բախումներում նահատակված հազարավոր տղերքի ծնողները, նրանց ընտանիքի անդամների մոտ հերթական հարցերն են առաջանում.
1. Եթե պաշտոնավարումից հետո հայտնաբերել էիր, որ 2007-ին արդեն իսկ Հայաստանը Արցախը ճանաչել է Ադրբեջանի կազմում, ապա ինչու այդ մասին հրապարակավ հայտարարություններ և պարզաբանումներ չհնչեցին:
2. Եթե 2007-ին արդեն իսկ կանխորոշված էր Արցախի ապագան, ապա Աշոտ Փաշինյանն ու մեր լույս տղերքն ի՞նչ էին անում Արցախում և ինչու համար:
3. Խոստում էր հնչել, որ Արցախի հարցը լուծվելու է Հանրապետության հրապարակում, ապա այդ դեպքում ինչու գոնե հանրությանը չտեղեկացրիք իրերի իրական վիճակի մասին, այլ դրա փոխարեն սկսեցիք բանակցել ձեր կետից, զրոյական կետից:
4. Խոստովանում եք, թե փորձել եք պայքարել 2007-ի որոշումների դեմ և ձախողվել եք: Մի՞թե չեք հասկանում, որ նման հարցերում ձախողելուց հետո հրաժարական եք տալիս:
5. Հասկանո՞ւմ եք արդյոք, որ Ազգային ժողովի ամբիոնից խոստովանեցիք, որ գիտակցաբար մեր որդիներին դրել եք զոհասեղանին, նախապես որոշում ունենալով, որ ինչ էլ լինի «մեզ պարտված չենք ճանաչելու»:
Կոչ ենք անում հանրության բոլոր շերտերին, գիտնականներին, դասախոսներին, ուսանողներին, ուսուցիչներին, ճարտարագետներին, բանվորներին, շինարարներին, բժիշկներին այլևս չլռել և հստակ պահանջել Նիկոլ Փաշինյանի հրաժարականը:
Կոչ ենք անում Ամենայն Հայոց Կաթողիկոսին հետևողական լինել իր նախաձեռնության մեջ, համախմբել բոլորին և նպաստել երկիրն այս վիճակից դուրս բերելուն:
Կոչ ենք անում ՀՀ ԱԺ բոլոր խմբակցություններին, այդ թվում Քաղաքացիական պայմանագրին, գիտակցել իրավիճակի ամբողջ լրջությունը և նախաձեռնել խաղաղ և անցնցում իշխանափոխություն:
Նիկոլ Փաշինյանի հետագա պաշտոնավարումը անարգանքի փորձ է մեր տղերքի հիշատակին»։
