Ուկրաինան ստեղծում է ռիսկեր՝ կապված զանգվածայի խոցման զենքի կիրառման հետ, այս մասին է վկայում Վլադիմիր Զելենսկու հայտարարությունը ՌԴ-ին ՆԱՏՕ-ի «կանխիչ հարվածի» մասին, ասել է ՌԴ ԱԳՆ-ի ղեկավար Սերգեյ Լավրովը, տեղեկացրել է «ՌԻԱ Նովոստի»-ն։
«Անշուշտ, մենք չենք կարող լռության մատնել այն բանավեճերը, որոնք վերջին ժամանակներս մշտապես ավելանում են, միջուկային զենքի հնարավոր կիրառման թեմայի վերաբերյալ, եւ հատկապես այդ առնչությամբ լռության մատնել Կիեւի վարչակարգի անմիտ գործողությունները, որոնք ուղղված են զանգվածային խոցման զենքի տարբեր տեսակների կիրառման ռիսկերի ստեղծմանը»,- ասել է նա «Միասնական Ռուսաստան» կուսակցության գերագույն խորհրդի միջազգային համագործակցության եւ արտասահմանում հայրենակիցներին աջակցության հանձնաժողովի չորրորդ նիստի ժամանակ։
«Երեկ Զելենսկին իր արեւմտյան տերերին կոչ է արել կանխիչ միջուկային հարված հասցնել Ռուսաստանին, դրանով իսկ այդ գործիչը, ըստ էության, ամբողջ աշխարհին ներկայացրել է այն սպառնալիքների ապացույցները, որոնք բխում են Կիեւի վարչակարգից եւ որոնց չեզոքացման համար սկսվել է հատուկ ռազմական գործողությունը»,- ընդգծել է Լավրովը։
Նա ավելացրել է, որ Զելենսկու քարտուղարների փորձերը՝ հաստատել, որ նա, իբր, նկատի է ունեցել ինչ-որ այլ բան, ծիծաղելի են, քանի որ դեռեւս հունվարին նա հայտարարել էր այն մասին, որ Ուկրաինան ձգտում է միջուկային զենք ունենալ։
Ավելի վաղ Զելենսկին, տեսակապով ելույթ ունենալով Ավստրալիայի Լոուիի ինստիտուտում, հայտարարել էր, որ ՆԱՏՕ-ն պետք է «կանխիչ» հարվածներ հասցնի ՌԴ-ին, այլ ոչ թե «սպասի Ռուսաստանի միջուկային հարվածներին»։ Ավելի վաղ Զելենսկու մամուլի քարտուղար Սերգեյ Նիկիֆորովը պարզաբանել է, որ նա ՌԴ-ի դեմ միջուկային զենք օգտագործելու կոչ չի արել, այլ նկատի է ունեցել կանխիչ պատժամիջոցները։
